Press Release No. 89 | March 31, 2021

GIHINGUSGAN SA Kagamhanang Probinsyal sa Bukidnon, pinaagi sa Provincial Disability Affairs Division (PDAD) ang pagpagahum sa Women with Disability, atol sa gipahigayong Women with Disability Equality Training didto sa Municipal Executive Hall, Poblacion, Libona, Bukidnon kaniadtong Marso 30, 2021. Kini alayon sa pagsaulog sa sa Women’s Month sa tibuok bulan sa Marso nga nagtangag sa temang: “Juana Laban sa Pandemya: Kaya!”

Sa mensahe nila Disability Officer IV Mr. Dominador D. Libayao ug Disability Officer II Ms. Reissa Valerie M. Tahadlangit sa PDAD, managsamang gihisgutan niini ang pagpagahum sa mga adunay kabilinggan lakip na niini ang mga kababayen-an, mga babag nga ilang gakasinati diha sa sosyodad, unsa ang ilang mabuhat diha sa komyunidad ug daghan pang uban.

Mitambong sa maong training ang mga lideres sa Person with Disabilities (PWD) sa 14 ka mga barangay sa lungsod sa Libona, Sectoral Head sa maong LGU nga si Ms. Ellen Oligario ug Municipal Disability Affairs Office designate Ms. Erica Centinales.

Sa susamang kalambuan, gipahigayon usab ang consultative meeting sa mga presidente sa PWD’s sa tibouk probinsya sa Bukidnon sa pagpanguna ni 3rd Legislative District Board Member Minerva C. Casinabe, ang chairman sa Committee on Women and Family Relations sa Sangguniang Panlalawigan (SP) kaniadtong Marso 25, 2021 sa Bukidnon Breeze, Sumpong, Malaybalay City.

Lakip nga gihisgutan sa maong panagtigum mao ang mosunod: presentasyon ug pagpasa sa Local Magna Carta for PWD’s ngadto sa SP nga nagbutyag sa mga katungod ug pribilihiyo sa mga adunay kabilinggan dinhi sa probinsya; pag-apruba sa duha ka resolusyon nga pagbalhin sa budget nga 1% sa Internal Revenue Allotment (IRA) alang sa PWD’s ug senior citizen gikan sa Provincial Social Welfare and Development Office (PSWDO) ngadto sa PGO-PDAD; ug ang magbutang ug representante sa PWD ngadto sa hawanan sa SP, sama sa Indigenous People Mandatory Representative (IPMR).

Ang maong mga programa hugot usab nga gisuportahan ni Gov. Jose Ma. R. Zubiri, Jr. ilabi na ang pagpagahom sa mga kababayen-an ug adunay mga kabilinggan sa kinabuhi ug patas nga pagtratar ug pagtagad alang kanila.

###