Press Release No. 92 | April 5, 2021

MAPASIGARBUHON nga giila ug hugot nga gipasalamatan ni 3rd District Congressman Manuel “Manoy” Zubiri ang nahimong dakong tabang sa nagkalain-laing Indigenous Peoples’ (IPs) sa Bukidnon sa Pamilya Zubiri gumikan kay nahimo kining instrumento nga magpadayon sa pagserbisyo nga bug-os sa kasing-kasing alang sa katawhan sa Bukidnon. Kini ang nahimong sentro sa mensahe ni Cong. Manoy, isip keynote speaker sa gipahigayong panapos nga programa sa Project Epanaw Coffee Table Book (CTB) Launching & Photo Exhibit, kaganiha-Abril 5, 2021 sa Centennial Stage, Kaamulan Park, syudad sa Malaybalay.

Gipakisayud ni Cong. Manoy nga agi ug tugbang sa pagsalig sa mga tribu sa Bukidnon sa ilang pamilya diha sa pagserbisyo sa publiko, magpadayon ang ilang suporta ug dili gayud mobiya sa pagtunol sa tabang nga labing gikinahanglan alang sa kaugmaran ug kalambuan sa dili mominus katorse-milyones ka mga IPs sa nasud. Usa sa gilantaw nga mga tabang sa kongresista ang paghatag ug livelihood program ug pag-giya sa mga IPs kung aha mamahimong makapanarbaho, ilabi na karon nga ang tanan apektado sa pandemya hatud sa COVID-19.

 Ang Project Epanaw o journey usa ka panaw nga nagpresenta sa tulo (3) ka libro [Book 1-Pagkilala; Book 2-Paggalang; Book 3-Pagtaguyod] nga mag-giya sa tanan nga mailhan kung kinsa ang naglangkub sa mga tribu sa Bukidnon, kung diin sila nagpuyo, ug kung unsa ka-kabilhon ang ilang yutang kabilin.

Pinaagi usab niini nga mga libro, gipanghinaut nga mapakita niini ang maayo ug respitadong paagi sa pagkinabuhi, ang ilang adunahan nga panulundon, mga naandan, sistema sa hustisya, ilang ritwal ug kultura sa mga tribu. Sa samang paagi, ikalipay usab sa mga tribu nga ipasundayag ang mamahimong makita sulod sa ilang Indigenous Cultural Communities/Indigenous Peoples (ICCs/IPs) nga pwedeng mahimong tourism destination, pagpasigarbo sa protected areas, ingon man sa natural resources.

Mahinumduman nga ang Project Epanaw Coffee Table Book (CTB) Launching and Opening of Photo Exhibit, gibuksan niadtong Marso 22, 2021 kung aha personal kining gitambungan ni Governor Jose Ma. R. Zubiri, Jr. diin malipayon usab niining gipasidunggan ang IPs sa Bukidnon sa kalampusan nga ilang nakab-ot pinaagi sa tulo ka mga libro.

Ang maong kalihukan gitambungan sa mga City/Municipal Indigenous Peoples’ Mandatory Representatives (IPMR), sa pagpanguna ni provincial IPMR Board Member Datu Richard Dinlayan Macas, tribal chieftains, Council of Elders, National Commission of Indigenous Peoples (NCIP) sa pagpanguna ni commissioner Atty Pinky Grace P. Pareja, ug 3rd District Board Member Minerve Casinabe.

###