Press Release No. 93 | April 5, 2021

GIKLARO ni Municipal IPMR Datu Cosme Lambayon sa lungsod sa Kitaotao, Bukidnon, kinsa kanhi National Commission on Indigenous Peoples (NCIP) Commissioner, nga nagtangag sa dakong hagit ang pagpadayon sa gimbuhaton sa Project Epanaw Coffee Table Book (CTB) Launching & Photo Exhibit nga pormal gitapos kaganiha-Abril 5, 2021, sa Centennial Stage, Kaamulan Park, syudad sa Malaybalay.

 Sa iyang panapos nga pahayag, gibutyag niini nga gisugdan niadtong tuig 2014 ang pagsulat sa CTB ug mapasalamaton nga hingpit kining nahuman ug nabuksan sa publiko pinaagi sa gilusad nga kalihukan. Tungod niini, hagit sa pito ka mga tribu sa lalawigan [Bukidnon, Talaandig, Tigwahanon, Manobo, Umayamnon, Matigsalog and Higaonon] nga magpadayon sa pagdiskobre sa mga bahandi-anon nga yutang kabilin, ingon man sa pag-protekta sa mga sagradong lugar nga mamahimong ikapasigarbo sa tanang katawhan.

Subay niini, gipasalig ni 3rd District Congressman Manuel “Manoy” Zubiri nga dalhon niya sa hawanan sa kongreso ang kopya sa libro nga timaan (token) ngadto kaniya isip dinapit nga mamomolong sa nasangpit nga kalihukan ug ipresenta sa iyang mga kaubanan sa ubos-balaybalaoranan ang nahimo sa Indigenous Peoples sa Bukidnon ug maningkamot nga madugangan ang pondo nga gigahin sa nasudnong panudlanon alang sa IPs sa nasud.

Sa susamang kalambuan, mapasalamaton si provincial IPMR Datu Richard Dinlayan Macas sa liderato ni Provincial Governor Jose Ma. R. Zubiri, Jr. sa gihatag nga suporta alang sa Project Epanaw ug sa padayong pagkab-ot sa ti-unay nga paghatag-gahum sa mga IP pinaagi sa tulo (3) ka aspetong social empowerment, economic empowerment ug political empowerment diha sa pagplastar sa indigenous political structure ug IP organizations.

Ang Project Epanaw nahatagan ug katumanan pinaagi sa hiniusang pakigtimbayayong sa National Commission of Indigenous Peoples (NCIP), Tourism Promotions Board sa Department of Tourism, pito (7) ka Indigenous Peoples sa probinsya, ug sa Provincial Government of Bukidnon.

###