Press Release No. 94 | April 7, 2021

HUGOT nga gipasalamatan ni Bukidnon Provincial Medical Center (BMPC) chief of hospital Dr. Miguel Antonio C. Prantilla ang hiniusang pwersa nila Senator Juan Miguel “Migz” Zubiri ug Congressman Manuel “Manoy” Zubiri sa pag-initiate nga matukoran ug Hemodialysis Center ang BPMC alang sa mga pasyenti sa End Stage Renal Disease (ESRD), atol sa Grand Opening & Blessing of Hemodialysis Center kaganihang buntag-Abril 7, 2021 sa BPMC, syudad sa Malaybalay.

Sigun ni Dr. Prantilla nga dako kaayo kining tabang sa pamilyang nanginahanglan ug suporta gikan sa gobyerno busa sila nga mga medical practitioners, bug-os ang kalipay sa kalampusan sa maong proyekto nga sugod magamit ugmang adlawa-Abril 8, 2021.

Sa pakigpolong ni Senator Migz, gibutyag niini nga nagsumikad ang plano sa pagtukod sa Hemodialysis Center human gipaabot ni Congressman Manoy ang hangyo niadtong tuig 2016 atol sa Bukidnon Anti-Poverty Summit nga unta makagahin ug pondo ang senador alang dinhi, ug tuod man gibubo-an kini ug pondo kantidad ₱10-Million, alang sa machines and equipment sama sa pito (7) ka dialysis units nga gipaagi sa DOH-Health Facilities Enhancement Program (HFEP). Gipasalig usab ni Sen. Migs nga ilakip na niya sa iyang pondo nga madugangan pa ang dialysis center ngadto sa BPH Manolo Fortich, Maramag ug Kibawe aron mapasayon ang pagpatambal sa mga pasyenti nga nagkinahanglan sa dialysis.

Mapasalamaton ug dako si Congressman Manoy sa senador tungod kay gihatagan niini ug katuman ang kaniadto usa lamang ka damgo sa mga pasyenti sa ESRD. Gipadangat usab niini ang pagdayeg sa walay puas nga pagsagubang sa mga frontline health workers sa Bukidnon Provincial Hospitals nga maasikaso ang mga pasyenti nga moabot sa mga ospital, ilabi na ning panahon sa pandemya.

Base sa Manual of Operating Procedure, sa 1,513,600 nga ihap sa populasyon sa Bukidnon sa tuig 2020, anaa sa 1:2,632 ang ratio sa makina kontra sa nagkinahanglan niini o 575 nga nag-antos sa ESRD sa Bukidnon. Ang mga makina gamiton niining mosunod nga paagi: 4 for regular sessions; 1 for renal patients with hepatitis B; 1 for COVID-19 patients; ug 1 for admitted patients and/or emergency cases. Ang BPMC mo-akomodar ug 42 patients matag semana; 24 alang sa regular session, 6 alang sa Hepa B reactive patients, 6 alang sa COVID-19 patients, ug 6 alang sa emergency/admitted patients.

Nahimong malampuson ang katukoran sa hemodialysis center pinaagi sa pag-abag sa DOH nga migahin ug ₱15-Million alang sa kontruksyon sa 1st floor, ₱10-Million usab ang gibubo sa Pangagamhanang Probinsyal alang sa 2nd floor ug ang kinahanglanon nga manpower ug operation and maintenance cost, samtang laing ₱10-Million nga pondo alang sa machines gikan sa opisina ni Senador Migz Zubiri.

Sa mensahe ni Governor Jose Ma. R. Zubiri, Jr. nga gibasa ni provincial administrator Atty. Jay S. Albarece nagkanayon nga, “garbo naku nga kini silang Senator Migz ug Cong. Manoy kanunay naglantaw sa kaayuhan sa mga healthworkers, dili lang sa polong apan pinaagi sa buhat, tan-awa lamang kining hemodialysis center ug uban pang natukod tungod sa ilang paningkamot.”   Dungan usab niini ang iyang dakong pagpasalamat sa sakripisyo sa mga frontline health workers sa nagkadaiyang ospital sa Bukidnon.

Ang maong kalihukan gitambongan sa mga personahe sa Department of Health nga gipanguhan ni regional director Dr. Jose R. Llacuna, kinsa gipasidunggan usab niini ang aksyon nila Senator Migz ug Congressman Manoy, mga personahe sa BPMC, provincial health officer Dr. Gary Guido Tabios, Jr., DOH-Bukidnon chief Dr. Vincent Ragudo, kanhi BPMC chief of hospital ug karon Assistant Regional Director sa DOH-Region 12 nga si Dr. Sulpicio Henry Legaspi, Jr., ug PhilHealth Bukidnon Chief Romulo Lapuz, Jr.

###