Press Release No. 99 | April 12, 2021

GI-AWHAG sa Provincial Government of Bukidnon (PGB), pinaagi ni provincial health officer Dr. Gary Guido C. Tabios, Jr. ang katawhan sa probinsya nga pahimuslan ang pagpangbakuna karon sa gobyerno, subay sa gihikyad nga National Vaccination Program kontra COVID-19, tungod sa padayong pagtaas sa kaso niini sa lalawigan ug sa tibuok nasud.

Sa mensahe ni Dr. Tabios, gihatagan niini ug gimbug-aton ang peligro nga hatud sa COVID-19 nga kung dili makumpasan ang pagtambal, mamahimong makamatay busa hugot ang panawagan niini sa tanang katawhan sa Bukidnon nga suportahan ang kampanya sa Department of Health (DOH) nga RESBAKUNA Kasangga ng Bida. Dili angayang mahadlok gumikan kay susama sa ubang bakuna, luwas ug epektibo ang tanang bakuna batok sa COVID-19.

Partikular nga gi-awhag sa provincial health officer ang tanang Barangay Health Emergency Response Team, labina ang mga Barangay Health Workers nga magpabakuna sanglit sila man ang anaa sa frontline sa pag-asikaso sa katawhan sa barangay ug sa higayon nga ipatuman ang vaccination diha sa ilang ka-barangayan.

Sa data gikan sa Provincial Health Office (PHO), pinaagi kang Ms. Aileen Shiella A. Dialimas, ang Cold Chain Manager nga napahigayon na ang 2nd dose vaccination sa frontline health workers sa BPMC, ang COVID-19 Center sa Bukidnon gamit ang Sinovac Vaccine niadtong Abril 5, 2021 diin sa 476 nga target mabakunahan sa 2nd dose base sa gidaghanon sa nabakunahan sa 1st dose, anaa lamang sa 465 ang completed niini gumikan sa special cases sa uban, sama sa pagtaas sa blood pressure ug natupokan sa anti-rabies vaccine. Kini gilangkuban sa 63 doctors, 219 nurses ug 183 administrative staff. Sa Valencia Temporary Treatment and Monitoring Facility, kinatibuk-ang 40 ka mga frontline workers usab niini ang nabakunahan diha sa BPMC Bakuna Center.

Dugang pa dinhi ang ihap sa nabakunahang BHERTs ug BHWs nga gisugdan niadtong Abril 5, 2021 nga nagpadayon pa usab hangtud karon. Gilauman nga laing batch sa Sinovac vaccine [2,750 doses] ang mahatag sa probinsya sa Bukidnon gikan sa DOH-Regional Office 10 alang sa padayong pagbakuna sa A1 Priority Population Group.

Gisugdan ang pagpangbakuna sa hospitals frontline health workers niadtong Marso 8, 2021 kung aha kinatibuk-ang 4,325 ang nabakunahan niini, as of March 18, 2021 nga data sa PHO.

Tungod niini nga pagpaningkamot, hugot ang panawagan ni Dr. Tabios sa tanan nga hatagan ug dakong higayon ang pagpabakuna aron malikay sa delikadong sakit sa COVID-19. Mamahimo lamang modangop sa pinakaduol nga COVID-19 vaccination area sa inyong matag LGU. 

###