Press Release No. 102 I April 16, 2021

GIBUKSAN sa Provincial Government of Bukidnon (PGB) ang Casablanca Park & Restaurant nga ania mahimutang sa Capitol Compound sa pagpanguna ni Governor Jose Ma. R. Zubiri, Jr. pinaagi sa Ceremonial Turnover, Ribbon Cutting and Blessing, kaganihang buntag-Abril 16, 2021, syudad sa Malaybalay.

Gipasigarbo sa gobernador ang simpli nga disenyo apan matahum nga katukoran sa gambalay nga gipalibutan sa maanindot nga talan-awon sa Kaamulan Park.

Subay sa Contract of Lease tali sa PGB ug sa tenant sa Casablanca Park & Restaurant nga si Mr. Reogine O. Epanag, kinsa nanag-iya sa Tiknoy’s Lechon Haus and Kambingan sa Barangay San Jose ning syudad, ang kontrata mamahimong epektibo sulod sa lima (5) ka tuig, sa ₱90,000.00 kada bulan nga renta alang sa tibuok nga commercial complex. Ang tenant gihatagan ug 45 ka adlaw gikan sa turnover date nga magsugod sa ilang operasyon nga gilaumang matigayon sa Hunyo 1, 2021, kung aha mamahimong mobisita alang sa fine dining, eat all you can ug anaa usab events hall and food hubs.

Ang Casablanca Park & Restaurant gisugdan ug trabaho niadtong Oktobre 28, 2020 ubos sa Design and Build Scheme tali sa PGB ug sa Jejor’s Construction ug nakumpleto sa Marso 16, 2021 nga adunay project cost kantidad ug ₱24,989,182.74, diin nakabarug ang duha ka building (with kitchen and comfort rooms), 6 units Alfresco, perimeter fence and parking area.

Gipaningkamotan nga matukod ang maong gambalay isip kabahin sa legasiya sa Infrastructure Supports nga Pillar of Good Governance ni Governor Zubiri, kauban ang laing duha pa ka mga commercial buildings dinhi sa syudad sa Malaybalay.

Mitambong usab sa maong kasaulogan sila Congressman Manuel “Manoy” Zubiri sa ikatulong distrito sa Bukidnon kauban ang mga miyembro sa 26th Sangguniang Panlalawigan nga sila Board Members Melchor Maramara, Oliver Owen Garcia, Benito Baguio ug Jose Palmada, lakip si Malaybalay City Councilor Cromwell Kiril Dinlayan, mga personahe sa Provincial Engineer’s Office sa pagpanguna ni Provincial Engineer Albert Yulo.

###