Press Release No. 103 I April 23, 2021

MAPASALAMATON si Department of Agriculture (DA) Regional Executive Director RFO-10 Carlene C. Collado sa Kagamhanang Probinsyal sa Bukidnon sa pagpanguna ni Governor Jose Ma. R. Zubiri, Jr., pinaagi sa Provincial Agriculture’s Office (PAO) sa pagahin ug paghatag sa dako nga counter-part aron maaprobahan ang proyekto nga coffee processing center sa Kape Maramag, Inc. sa DA ubos sa Philippine Rural Development Project (PRDP) sa lungsod sa Maramag.

Gibutyag ni Director Collado nga ang opisina sa PAO, sa pagpanguna ni Engr. Alson G. Quimba uban sa ilang mga kawani, ang naningkamot pinaagi sa kanunay nga pag-follow-up sa mga papeles ug pag-apil sa mga trainings sugod pa kaniadtong tuig 2015 hangtud nga naaprobahan kini aron matuman ang maong proyekto.

Gipasalamatan usab niini ang Local Government Unit (LGU) sa Maramag sa pagpanguna ni Mayor Jose Joel P. Doromal sa pagsuporta sa mga benepisyaryo, paghatag niini ug luna aron matukod ang processing center lakip na ang drier ug pagdasig sa mga membro nga magpadayon luyo sa mga nasinati niini nga mga problema.

Sa nahimong mensahi ni Mayor Doromal, gibutyag niini nga gipaningkamutan gayod sa iyang administrasyon ang paggahin ug pundo aron matabangan ang maong organisasyon nga mapadayon ang ilang mga nasugdan gumikan kay ang maong proyekto dako ug makatabang sa mga kabus ug sa mga kabarangayan ilabi na sa gapananom ug kape.

Gibutyag ni provincial agriculturist Engr. Alson G. Quimba nga ang kinatibuk-ang proyekto nga Coffee Processing and Marketing Enterprise, RIC Federation of Kape, Maramag, Inc., mikabat ngadto sa ₱10,538,259.01 nga naglangkob sa PRDP-Loan Proceeds ₱4,994.696.34, Government of the Philippines- ₱1,664,898.78, Provincial Government of Bukidnon- ₱1,664,898.78 ug Kape Maramag Equity (cash/kind)- ₱2,213,765.11 diin aduna kini 1,060 nga benepisyaryo.

Ang maong ground breaking activity gipahigayon niadtong Abril 16, 2021 sa South Poblacion, Maramag, Bukidnon nga gitambungan sa mga benepisyaryo, mga opisyal, Municipal Agriculturist Amelyn C. Obial ug sa mga dinapit nga bisita.

###

video/photo credits to: Provincial Agriculture Office-Bukidnon