Press Release No. 104 I April 26, 2021

NANAWAGAN si Bukidnon Provincial Gov. Jose Ma. R. Zubiri, Jr. sa tanang katawhan nga maghiusa aron maluwas ang atong kalikupan. Kini ang nahimong tipik sa mensahi ni Gov. Zubiri, Jr. pinaagi kang Provincial Administrator Atty. Jay S. Albarece sa gipahigayong pagbuhi sa Philippine Eagle didto sa Namnam, San Fernando, Bukidnon. Gidayeg niini ang Philippine Eagle Foundation sa pag-alima ni Philippine Eagle “Tagyaman Fernando” gikan sa pagkadakop niini 6 ka bulan na ang milabay nga gidala sa Bukidnon Provincial Zoo and Wildlife Sanctuary nga nagluya, gigutom ug samaran diin sa kasamtangan kini baskog, kusgan ug garbo nga mabalik ang iyang kagawasan ug andam mobuhat sa iyang papel diha sa kinaiyahan.

Mapasalamaton usab si Gov. Zubiri sa Australian Government pinaagi sa Australian Aid sa mga tabang niini sa probinsya sama sa infrastructure projects ug government reforms ug pinakadako nga donor sa maintenance sa mga provincial roads. Dakong pasalamat usab sa gobernador sa papel sa mga indigenous people diha sa pagprotektar sa kinaiyahan ug ang pagluwas, pagkaayo ug pagbalik sa pagbuhi sa agila, usa kini ka dakong kalampusan alang kanila sa tabang sa Philippine Eagle Foundation. Kanunay usab niining giampo nga bendisyonan ang mga lumad sa pagprotektar ug pagpreserbar sa kinaiyahan nga maoy pinuy-anan ni Tagyaman.

Samtang mapasalamaton si Majority Floor Leader of The Senate of the Philippines Juan Miguel Zubiri ngadto kang Australian ambassador to the Philippines His Excellency Steven J. Robinson AO nga personal gayod nga mitambong ug misaksi sa pagbuhi ug balik sa lasang kang Tagyaman Fernando. Gidasig ni Sen. Zubiri ang mga kadagkuan sa gobyerno sa legislatibo ug ehekutibo ilabi na sa mga ahensya sa Provincial Environment and Natural Resources nga kinahangalan mangita ug mga pamaagi nga matabangan ang mga IP’s nga mahatagan ug malahutayong livelihood aron dili na sila mamutol ug kahoy ug dili na mangdakop sa mga hayop aron ibaligya.

Sa laing bahin malipayon ug naghinam-hinam si Australian Ambassador to the Philippines His Excellency Steven J. Robinson AO nga mibisita sa probinsya sa Bukidnon. Midesisyon kini nga mobisita sa probinsya gumikan kay adunay suod nga relasyon ang Bukidnon ug ang Australia sa milabay na nga mga katuigan aron kini mapalambo. Usa usab nga rason niini mao ang pagsaulog sa ika-75 nga tuig sa diplomatic relationship sa Pilipinas ug Australia ug kinahanglan kining saulogon pinaagi sa pagtanom sa 75 ka mga kahoy ug ang pagbuhi sa Philippine Eagle. Gidayeg usab sa ambassador ang kanindot sa Bukidnon ilabi na tabonok nga yuta, mga kabukiran ug ang nindto nga klima.

Samtang gidasig ni DENR-10 Regional Executive Director Arleigh Adorable ang tanang katawhan ng manginlabot diha sa pag-amping sa kinaiyahan. Naghangyo usab kini sa mga magbabalaod nga tabangan ang ilang buhatan aron ang tibouk Mt. Pantaron Range madeklara nga protected area.

Ang pagbuhi sa Philippine Eagle nga ginganlan ug Tagyaman Fernando alayon sa pagsaulog sa Earth day diin lakip nga gipahigayon ang tree planting nga gisaksihan ni PENRO Vergilino P. Alima, Philippine Eagle Foundation Trustee Francis Ledesma uban sa iyang mga kawani, mga opisyal sa LGU sa pagpanguna ni Vice-Mayor Norberto I. Catalan, San Fernando Parish Priest Conrado Casas, Jr. ug mga indigenous people sa maong dapit niadtong Abril 22, 2021.

###