Press Release No. 105 April 27, 2021

GIPASABOT ni Bukidnon Provincial Governor Jose Ma. R. Zubiri, Jr. sa mga miyembro sa Sangguniang Panlalawigan (SP) ang gihimong pagsuspendi sa pagpanghatag sa ayuda sa panahon sa Peoples’ Day sa Provincial Government of Bukidnon (PGB), nga naandan na sa katawhang nanginahanglan ug tabang gikan sa gobernador sa matag adlaw’ng Miyerkoles.

Sa gitagana nga privilege hour ngadto kang Governor Zubiri sa mga miyembro sa SP, dungan sa ika-88 nga regular session karong adlawa-Abril 27, 2021, gibutyag sa gobernador nga gikasubo niya ang nahitabo nga dakong panagtapok ug tungod kay wala masunod ang gitakda nga minimum public health protocol sa Department of Health nga social distancing o pagdistansya sa ubang tawo sa dili mominus sa usa ka metro, gipursige niini nga i-suspendi ang Peoples’ Day aron dili mahitumpawak sa COVID-19.

Sa susamang kalambuan, personal nga gipadangat sa gobernador ang iyang hangyo sa SP alang sa usa ka resolusyon nga maghangyo sa Land Bank of the Philippines nga aprobahan ug palapdan ang reloadable e-money card sa probinsya sa Bukidnon nga gamiton alang sa paghatag sa tabang-pinansyal ngadto sa pinaka-kabus nga hut-ong sa katilingban, kung aha matabangan gihapon sila nga dili na maglinya dinhi sa Kapitolyo.

Sa database gikan sa Provincial Social Welfare and Development Office, dul-an sa 30,000 families sa tibuok probinsya nga poorest among the poor. Ang pagtunol sa tabang-pinansyal mahitabo kausa sa matag tulog ka bulan o ka-upat sa usa ka tuig, kini aron kahatagan usab ug higayon nga matunolan sa hinabang ang uban pa nga nanginahanglan.

Tungod kay gikunsidera nga ang reloadable e-money card dakong tabang niini nga sitwasyon sa pagtunol sa hinabang, gipadangat ni Governor Zubiri sa SP nga dinalian ang maong hangyo ug nangkinahanglan kini sa ilang suporta aron mapadayon ang programa sa Aid to Individual/Families in Crisis Situation (AIFCS).

###