Press Release No. 107 I April 28, 2021

PAGASUGDAN na sa Provincial Government of Bukidnon (PGB) ang pagtunol sa tabang-pinansyal ngadto sa nagkalain-laing lokal nga kagamhanan ingon man sa kabaranggayan niini karong Mayo 5, 2021, kung aha kinatibuk-ang ₱989,000,000.00 ang pondo nga gigahin sa pangagamhanang probinsyal. Nakatakdang modawat sa tag-25 milyones ka pesos ang mga LGUs ug tag-₱1-million pesos ang 464 barangays sa Bukidnon.

Gibutyag ni Provincial Budget Officer Fe C. Retuertas, ang pagahin sa pondo nahasubay sa giaprobahang Annual and Supplemental Investment Plan alang ning tuig 2021 diin ang pondo nagikan sa General Fund ug sa 20% Development Fund.

Matag tuig naga-programa si Provincial Governor Jose Ma. R. Zubiri, Jr. ug pondo diha sa Annual Investment Plan alang sa priority infrastructure projects ingon man sa mga proyekto nga gitumbok sa mga LGUs ug BLGUs, subay sa Infrastructure Supports ubos sa Pillars of Good Governance ni Governor Zubiri.

Pipila sa mga mahinungdanon nga nahimo ni Governor Zubiri sa mga lungsod ug syudad lakip diha sa mga barangay sa lalawigan mao ang pagpatukod sa mga administration and legislative buildings sa mga munisipyo, bag-ong public markets, food courts, public terminals, municipal gymnasiums, market stalls, water systems, multi-purpose buildings, pagpatukod sa mga barangay halls, health centers, day care centers, purok centers, covered courts, solar dryers, pagpa-ayo sa mga barangay roads, ug daghang pang uban.

Sa pagsugod ni Governor Zubiri isip amahan sa probinsya sa tuig 2001 hangtud 2010 ug sa pagbalik niini sa tuig 2013 hangtud sa kasamtangan, mikabat sa ₱2,816,590,447.32 ang natunol nga tabang-pinansyal sa mga LGUs ug BLGUs, kung aha kinatibuk-ang ₱3,805,590,447.32 lakip karong tuig 2021.

###