https://youtu.be/qPGJG58m7kQ

Press Release No. 108 I April 30, 2021

HUGOT nga gisuportahan sa Provincial Government of Bukidnon (PGB), sa pagpanguna ni Governor Jose Ma. R. Zubiri, Jr., ang programa sa Enhanced Comprehensive Local Integration Program (E-CLIP) dinhi sa lalawigan, kung aha gahinan niini ug pondo kantidad ₱2,000,000.00 ang livelihood assistance sa mga former rebels (FRs).

Sa mensahe ni Governor Zubiri sa gihimong Grant of Livelihood Assistance, Immediate Assistance, and Firearms Renumeration ubos sa E-CLIP kagahapon-Abril 29, 2021 sa Kaamulan Open Theater, syudad sa Malaybalay, gipadangat niini ngadto sa 48 ka mga FRs ang iyang dakong kalipay, isip amahan sa Bukidnon, nga nagdesisyon sila nga mobalik sa sabakan sa gobyerno alang sa ilang matag pamilya nga magpuyong malinawon. Gipakisayud usab niini nga labing-malampuson karon ang Bukidnon human mapaubsan ang gidaghanon sa kabus ug naangkon ang 5th wealthiest province sa nasud, busa gihatag sa gobernador ang tukmang pag-abag sa mga FRs alang sa pagbag-o sa ilang kinabuhi.

Subay sa kasayurang gipadangat ni Provincial Budget Officer Fe C. Retuertas, mihatag usab si Governor Zubiri ug ₱5,000,000.00-livelihood assistance sa mga pamilya sa naonang 100 FRs sa miaging bulan sa Marso, 2021.

Sa data sa DILG-Bukidnon, nga gipangunahan ni provincial director Engr. Carmelo Enrique B. Libot, CESO V, gawas sa maong livelihood assistance sa PGB, gidawat na usab sa 48 ka mga FRs kagahapon gikan sa nasudnong pangagamhanan ang kinatibuk-ang ₱1,925,000.00 [immediate assistance – ₱675,000.00; livelihood assistance – ₱1,250,000.00], nga gilangkuban sa 26 ka regular members sa NPA ug 22 ka Militia ng Bayan (MB).

Gikan sa Enero hangtud Marso 2021, ang Provincial E-CLIP committee nagpasiugda sa pagtunol sa financial assistance packages, nga mao ang mosunod: immediate assistance nga adunay kinatibuk-ang ₱1,335,000.00 alang sa 89 beneficiaries; livelihood assistance – ₱2,000,000.00 alang sa 40 beneficiaries; firearms renumerations – ₱2,982,000.00 alang sa 86 beneficiaries; ug reintegration assistance – ₱2,012,800.00 alang sa 142 beneficiaries. Lain pang pagtabang kung aha 100 FRs ang hingpit nakaangkon ug housing units, diin gi-abaga sa PGB ang pagpakutay sa kuryenti ug tubig kantidad ₱600,000.00. Mihimo usab ug inisyatibo ug pakigtimbayayong ang Provincial E-CLIP alang sa Localized Peace Engagement Forum with Former Rebels’ People’s Organization nga gipasiugdahan sa 1003rd Brigade Philippine Army ug ang katukoran sa Bukidnon Halfway House sa Impasugong, Bukidnon.

Sa maong kalihukan, gipasabot ni Engr. Libot ang tumong sa E-CLIP nga usa kini ka programa sa kagamhanan nga nagtinguhang tabangan ang atong mga kaigsoonang nahimong miyembro sa CPP-NPA-NDF ug MB nga buot mobalik sa sabakan sa gobyerno ug sa komunidad aron maangkon ang malangkubon ug mapadayonon nga kalinaw sa nasud.

Ang maong kalihukan gitambungan sa Provincial E-CLIP Committee kung aha chairman si Governor Zubiri, Co-chair ang commander sa 403rd Brigade nga si BGen Ferdinand T. Barandon nga girepresentahan ni Lieutenant Colonel Julito P Garay, (MI) GSC PA, ug miyembro ang IPMR representative Board Member Richard Macas, PWSD Officer Ceferina Caiña, DILG-Bukidnon provincial director Engr. Libot, ug PNP-Bukidnon provincial director Police Colonel Jun Mark J Lagare.

###