Press Release No. 123

May 14, 2021

NAGPADAYON ang ikaduhang hugna sa pagpamakuna sa Provincial Government of Bukidnon (PGB), pinaagi Provincial Health Office (PHO) ngadto sa mga senior citizens gamit ang Oxford AstraZeneca vaccine sugod niadtong Mayo 12, 2021 og gilaumang mahuman karong umaabot Mayo 17, 2021.

Gikunsidira sa Department of Health (DOH) isip ikaduhang prioridad nga mabakunahan sa COVID-19 vaccine ang mga senior citizens o kadtong nag-edad 60-anyos pataas tungod kay gilantaw niini nga mas huyang og mas dali silang matakbuyan sa COVID-19 virus ilabi na kadtong adunay comorbidities o adunay gihambin nga mga balatian.

Sa kasayuran gikan sa PHO, adunay alokasyon nga 6,498 sa Oxford AstraZeneca vaccine alang sa ikaduhang hugna sa mga senior citizens sa mosunod nga mga Local Government Unit (LGUs): Malaybalay City- 1,798; Valencia City- 2,100; Manolo Fortich- 800; Quezon- 600; Don Carlos- 300; Maramag- 600; Impasugong- 150; og Cabanglasan- 150 diin anaa sa kinatibuk-ang 63, 165 ka target nga senior citizens sa maong lungsod og syudad.

Kahinumduman nga gisugdan sa probinsya ang pagpamakuna ngadto sa mga frontline health workers sugod niadtong Marso 8, 2021 subay sa National Vaccination Program kung aha miabot ngadto sa 8,047 ang nabakunahan sa Oxford AstraZeneca og 15,061 ang nabakunahan sa SINOVAC vaccine nga gilangkuban sa frontline health workers og 2,260 ka mga senior citizens.

Sa data gikan sa Department of Health, nag-una sa Priority Population Group alang sa COVID-19 immunization ubos sa Phase 1-Priority Eligible A ang mga Frontline Health Workers sa pribado o publikong health facilities, ikaduha ang mga senior citizens o 60-anyos pataas, ika-tulo ang mga hamtong (adults) nga dunay mga balatian, ika-upat ang mga frontline personnel nga nagtrabaho sa pribado o publikong tunghaan lakip na ang mga uniformed personnel og kadtong giila sa IATF nga direktang gaatubang sa ilang kliyente, ika-lima ang kadtong mga kabus nga naa sa lista sa National Household Targeting System for Poverty Reduction (NHTS-PR). Gisundan na dayon kini sa Phase 2-Priority Eligible B og ang katapusan mao ang Phase 3- Priority Eligible C.

###