Press Release No. 124

May 26, 2021

GIDASIG ni Department of Interior and Local Government (DILG) Provincial Director Engr. Carmelo Enrique Libot ang 105 ka mga former rebels nga gamiton sa insakto ang livelihood assistance, immediate assistance ug firearm renumeration nga gihatag sa gobyerno pinaagi sa Enhanced Comprehensive Local Integration Program (E-CLIP). Kini matud pa indikasyon nga ang nasyonal nga pangagamhanan sa pagpanguna ni Presidente Rodrigo R. Duterte uban sa Pangagamhanang Probinsyal sa Bukidnon andam motabang sa mga mibalik sa sabakan sa balaod aron magmalinawon ug magmalambuon ang atong nasud luyo sa pandemya nga atong giatubang karon.

Gipasabot usab ni DILG Regional Director Arnel M. Agabe pinaagi sa virtual video ngadto sa mga former rebels nga ang E-CLIP pinansyal nga tabang alang kanila diin magamit sa ilang panginabuhian ug puluy-anan sa ilang pagbalik sa komyunidad ug aron hingpit na nilang makauban ang ilang tagsa-tagsa ka pamilya. Gipaabot usab ni RD Agabe nga pinaagi sa gipirmahan ni Presidente Duterte nga Administrative Order No. 25, nga dili lamang ang mga mosurender nga CPP/NPA/NDF members ug militia ng bayan ang makabenepisyo sa complete package nga E-CLIP Assistance, apan lakip na niini ang mga nagsurender nga mga membro sa Abu Sayyaf Group, Maute Group ug uban pang mga membro sa violent/extremist group.

Gipaabot usab ni provincial administrator Atty. Jay S. Albarece ang dakong pagpasalamat ni Bukidnon Provincial Governor Jose Ma. R. Zubiri, Jr. ngadto sa mga former rebels. Dugang ni Atty. Albarace nga luyo niini, aduna pa gihapon nagpabilin nga mga rebelde nga naa sa mga kabukiran nga nakigbisog sa armadong pamaagi.  Sa kasaysayan, walaý nasod nga nakabarog nga gigamit ang ideolihiya nga pamaagi. Gidasig sa provincial administrator ang mga former rebels nga aron magmalumpuson ang ilang mga anak, kinahanglan magtuon, mag-eskwela, makatrabaho ug ensakto ug magnegosyo sa pamaagi nga subay sa balaod.

  Samtang gidasig usab ni Indigenous People Mandatory Representative (IPMR) Richard Dinlayan Macas ang mga former rebels nga pahimuslan ang gitanyag sa gobyerno nga mga kaayuhan sa kasamtangan labi na ang Indigenous Peoples’ Rights Act of 1997 o IPRA Law nga naghatag sa mga lumad ug kahigayonan nga maangkon ang ilang yutang kabilin gikan sa ilang katigulangan.

Ang Bukidnon E-CLIP Committee Release of DILG-Administered Financial Assistance gitambungan sa mga kawani sa DILG-Bukidnon, mga kasundaluhan ug kapulisan pinaagi nilang PA Col. Arn Real, Deputy Brigade Commander sa 403rd Phil. Army ug Police Lt. Col. Daryl Aranton, Bukidnon Deputy of PNP Provincial Director for Administration ug 105 ka mga former rebels diin mokabat sa kinatibuk-ang ₱4,825,000.00 ang ilang madawat nga gipahigayon sa Kaamulan Open Theater, Kaamulan Park, kaniadtong Mayo 26, 2021.

###