Press Release No. 126

May 26, 2021      

GIAWHAG karon sa Provincial Government of Bukidnon (PGB), pinaagi sa Provincial Health Office (PHO) sa pagpangunana ni Dr. Gary Guido C. Tabios Jr., kinsa mao ang Vice-Chairman sa Provincial COVID19 Inter-Agency Task Force (IATF), ang tanang katawhan nga mosunod og mo-kooperar sa direktiba sa Department of Health (DOH) aron makunhod ang kaso sa COVID-19.

Gipahayag ni Dr. Tabios atol sa “Isumbong Mo Kang Governor” radio program kagahapon-Mayo 25, 2021, nga tungod sa nagkataas nga kaso sa COVID-19 sa lalawigan, miresulta kini sa pagkapuno sa Bukidnon Provincial Medical Center (BPMC) tungod kay mao lamang kini ang nag-inusarang hospital sa tibuok probinsya nga gadawat ug mga pasyente nga natakbuyan sa maong virus. Dugang niya nga ang si kinsa mang magpositibo sa virus nga kinahanglan e-admit, magpaabot pa nga dunay mabakanteng covid bed aron ma-accomodate.

Gipasabot usab ni Dr. Guido nga imposibleng mokunhod ang kaso kung walay partisipasyon gikan sa katawhan, busa, iyang gipahimangnoan ang tanan nga magbaton ug disiplina sa kaugalingon, likayan ang paglakaw-lakaw kung dili importante, magsunod sa minimum public health protocols sama insakto nga pagsuot ug facemask/face shield, paghugas sa kamot og pagdistansya gikan sa ubang tawo.

Sa gipahigayon nga regular session sa Sangguniang Panlalawigan kagahapong adlawa, Mayo 25, 2021, gihisgutan usab ni Board Member Atty. Oliver Owen L. Garcia nga sumala sa datus gikan sa Northern Mindanao Health Cluster, ang aktibong kaso sa COVID-19 sa probinsya sa milabay’ng Abril 17-Mayo 10, 2021 anaa lamang sa 278, apan pag-abot sa Mayo 11 ngadto sa Mayo 24, 2021 misaka ang aktibong kaso ngadto sa 827 o dunay growth rate nga 197.48% kung aha makonsidera ang probinsya sa Bukidnon nga anaa sa medium risk. Gipasabot pa ni Atty. Garcia nga kung moabot na ngadto sa 200% ang increase sa growth rate, makonsidera na ang Bukidnon isip high risk og posibleng mas pahugtan pa ang quarantine status kung magpadayon pa ang pagtaas sa kaso sa COVID-19.

Sa datus gikan sa Provincial Health Office (PHO), as of May 26, 2021 (7:42AM) adunay kinatibuk-an nga 598 active cases ang probinsya, 3,392 ang naka-recover, 62 ang namatay og 3,851 ang total confirmed cases. Nag-una sa dunay pinakataas nga aktibong kaso sa COVID-19 ang syudad sa Valencia nga adunay ihap nga 163; gisundan kini sa lungsod sa Manolo Fortich- 97; syudad sa Malaybalay-79; lungsod sa  Libona-52; lungsod sa Maramag- 45; lungsod sa Talakag- 33; lungsod sa Baungon-16; lungsod sa Pangantucan-15; lungsod sa Kitaotao-14; lungsod sa Malitbog- 12; lungsod sa Kalilangan og Quezon-11; lungsod sa Impasugong- 7; lungsod sa Don Carlos- 6; lungsod sa Cabanglasan og Kibawe- 3; lungsod sa Sumilao, Dangcagan og Kadingilan- 2; lungsod sa Lantapan- 1; samtang gawasnon sa maong virus ang lungsod sa Damulog og San Fernando.

Sa laing bahin, gipahibalo ni Dr. Tabios, as of May 25, 2021 mitala ngadto sa 38,000 ka mga indibidwal ang nabakunahan na alang sa 1st dose og 8,000 ang nabakunahan sa 2nd dose kalabot na sa pagpatuman sa National Vaccination Program dinhi sa Bukidnon.

###