Press Release No. 127

May 27, 2021

GIHATAGAN sa gimbug-aton sa Provincial Government of Bukidnon (PGB) ang pagpabarug sa maayong kalidad sa mga imprastraktura sa tinguha nga maangkon ang malahutayon ug malangkubon nga kalambuan sa lungsod sa Damulog, Bukidnon, kung aha kadaghanan sa katawhan dinhi makabenepisyo duyog sa panglantaw nga makunhuran ang kapobrehon sa komunidad, sanglit makatigayon man sa partisipasyon sa lihok sa ekonomiya ang mga molopyo niini, pinaagi sa katumanan sa de-kalidad ug kasaligan nga mga serbisyo sa imprastraktura.

 Sa pagpangamahan ni Governor Jose Ma. R. Zubiri, Jr. gitutokan niini ang mga gabayan sa maayong pagpangatungdanan, diin usa na niini ang Infrastructure Supports ngadto sa mga lokal nga kagamhanan niini, lakip ang sa kabaranggayan, gikan sa tuig 2001 hangtud ning tuig 2021.

Dinhi sa lungsod sa Damulog, gitunol ni Governor Zubiri ang kinatibuk-ang ₱185,808,504.98, kung aha gi-alokar kini sa mga mosunod nga programa pang-imprastraktura: 1. Infrastructure Projects nga gipatuman sa PGB pinaagi sa Provincial Engineer’s Office – balor ug₱19,803,952.59 ang kinatibuk-ang kantidad sa roads & bridges projects diin anaa sa 210.677 kilometers nga kalapdon sa barangay roads ang napa-ayo ug ingon man ayuhonon diha sa 17 ka mga barangay sa maong lungsod ug ₱20,108,184.64  ang nagahing pondo alang sa school building projects diin adunay 15 units or 20 classrooms ang natukod, ug laing 23 ka mga classrooms ang napaayo. 2. Financial Assistance to Local Government Unit – pinaagi sa pag-abag sa pangagamhanang probinsyal, natukod ang mga gambalay sa maong lungsod, sama sa public terminal, municipal gymnasium, market building, water system project sa Sitio Tambad, lying-in building alang sa mga kaigsoonang lumad, diin tanan mikantidad sa  ₱64,860,000.00, lakip na dinhi ang dugang ₱25-milyones ka pesos alang sa 2021 nga priority infrastructure projects sa lungsod sa Damulog;3. Financial Assistance to Barangay Local Government Units – lain pang ₱81,036,367.75 ang natunol sa pangagamhanang probinsyal alang sa nagkalain-laing proyekto sa 17 ka mga barangay sa Damulog, sama niining pipila ka mga proyekto: construction of barangays roads, katukoran sa barangay offices, health centers, day care centers, CVO outposts, solar driers, water supply systems, pagpa-ayo sa bailey bridge, katukoran sa multi-purpose buildings, pagpa-ayo sa nagkalain-laing barangay offices, pagmintina sa barangay roads, lakip na dinhi ang tag-₱1-million alang sa priority infrastructure projects sa mga barangay alang ning tuig 2021.

Gilantaw nga pinaagi niini nga mga proyekto sa PGB ug sa LGU-Damulog, ubos sa liderato ni Municipal Mayor Melino L. Buro, hayan motaas ang oportunidad sa patigayon ug ingon man produksyon sa panginabuhian sa katawhan sa maong lungsod.

###