Press Release No. 163

August 2, 2021

GIBUKSAN sa Provincial Government of Bukidnon (PGB), pinanguluhan sa Provincial Health Office (PHO) ang Breastfeeding Awareness Month Celebration, pinaagi sa usa ka motorkada nga gipahigayon karong adlawa, Agosto 2, 2021 palibot sa Kaamulan Park, syudad sa Malaybalay, Bukidnon.

Ang kasaulogan karong tuiga nagtangag sa temang “Tulong-Tulong sa Pagpapasuso sa – First 1000 Days”, kung aha gihatagan ug gimbug-aton sa gobyerno ang kamahinungdanon sa breastfeeding sulod sa 1000-days sugod sa pagmados sa kababayen-an hangtud sa mag-edad ngadto sa duha (2) katuig ang bata, kung aha mao ang panahon nga ang usa bata magkat-on, motubo ug molambo kung mahatagan ug hustong nutrisyon.

Sa impormasyon nga gipaabot ni Ms. Rebecca R. Hibaya, Nutritionist Dietician II sa PHO, hugot nga gisuportahan ni Bukidnon Governor Jose Ma. R. Zubiri Jr. ang hangyo sa PHO nga maggahin ug pundo kantidad Php 67,000.00 alang sa pagmugma ug dugang breastfeeding room sa probinsyaug alang usab sa pagpalit sa mga gikinahanglang gamit sama sa refrigerator, katre, bangko ug uban pa. Sa kasamtangan, adunay duha (2) ka mga bakanteng pasilidad ang gihimong breastfeeding rooms sa PHO nga anaa nahimutang sa Provincial Human Resource Management Office (PHMRO) ug ang usa usab anaa sa National and Provincial Offices (Old Provincial Hospital). Kini gibuksan aron masiguro nga adunay komportable ug pribadong lugar ang mga inahan dili buot magpasuso sa publikong mga lugar.

Gibutyag usab ni Ms. Hibaya nga ang ang tanang lungsod/syudad sa probinsya aduna nay breastfeeding room sa ilang matag-Health Centers. Bukas na usab ang breastfeeding room diha sa merkado publiko sa syudad sa Valencia, lungsod sa Manolo Fortich, Cabanglasan, ug lungsod sa Maramag kung aha giila nga maoy pinaka-unang lungsod nga nagbukas ug breastfeeding room sa merkado publiko. Samtang, padayon pa ang pag-reconstruct sa breastfeeding room sa lungsod sa Don Carlos ug Sumilao.

Ang kampanya alang sa unang 1000-days ni baby gipakusgan ubos sa mandato sa Republic Act (R.A) 11148 o mas naila nga “Kalusugan at Nutrisyon ng Magnanay Act of 2018” nga nagmando sa paghatag ug pagtagad sa kahimsog sa panglawas ug nutrisyon, pinaagi sa gipalig-on nga mga programa ug serbisyo alang sa mga kababayen-an gikan sa ilang pagmabdos, pagpanganak ug hangtud mag edad sa duha (2) ka tuig ang bata.

###