Press Release No. 164

August 5, 2021

NANINGKAMOT nga makapangita ang Provincial Government of Bukidnon (PGB) ug supplier sa COVID-19 vaccines sa tinguha nga mabakunahan ug maprotektahan ang katawhan sa lalawigan batok sa makamatay nga virus. Kini ang panawagan ni Provincial Governor Jose Ma. R. Zubiri Jr. sa gipahigayon nga dinaliang panagtigum sa tanang mga mayores ug myembero sa Provincial Inter-Agency Task Force (PIATF) kagahapong adlawa, Agosto 4, 2021 sa Kaamulan Open Theater, Kaamulan Park, Malaybalay City, Bukidnon.

Agi ug pagsuporta sa lakang sa kagamhanang probinsyal, gipalabang sa Sangguniang Panlalawigan ang Resolution No. 2021-2652 (26th SP), pinetsahan Abril 13, 2021, nga nagtugot sa pagpalit ug 600,000 doses sa Covovax vaccine kantidad 411-milyon ka pesos aron sa pagpalit ug bakuna kontra Covid-19. Apan gikasubong gipahibalo nga hangtud karon dili pa makahatag ang supplier tungod kay wala pay Emergency Use Authorization (EUA) ang maong bakuna gikan sa Food and Drug Administration (FDA). Sa maong kadaghanong 600,000 doses, gilauman nga moabot ngadto sa 300,000 ka mga indibidwal ang makapahimulos sa maong bakuna gikan sa pangagamhanang probinsyal. Gikonsidera kini ni Gov. Zubiri nga dinaliang lakang sa pagsiguro nga masulosyonan ang nagkataas nga aktibong kaso sa probinsya.

Sa data nga gipaabot ni provincial health officer Dr. Gary Guido C. Tabios, Jr., as of August 5, 2021, anaa na sa 122,457 ka indibidwal o gibana-bana nga anaa sa 12%-13% gikan sa target eligible population nga 874,286 ang kompletong nabakunahan sa tibuok probinsya. Gidugang usab ni Dr. Tabios nga as of August 3, 2021, nakatala ang probinsya ug kinatibuk-ang 9,317 total confirmed cases, kung aha 1,706 niini ang aktibong kaso, 8,700 ang naka-recover na ug 128 ang namatay. Sa susamang hisgutanan, gipahibalo ni Dr. Tabios ang Provincial Risk Classification diin anaa na sa 4.48 o 8.71% ang Average Daily Attack Rate kung aha gikunsudera kini nga high risk; 94% o 977 active cases sa 1-2 vs 3-4 growth in cases nga gikunsidera usab nga medium risk.

Sa katapusan, gitahasan ni Gov. Zubiri sila si provincial administrator Atty. Jay S. Albarece [representanti ni Gov. Zubiri], Dr. Tabios [representanti sa health sector], ex-officio board member/PIATF co-chairman Atty. Oliver Owen L. Garcia [representanti sa Sangguniang Panlalawigan], ug Cabanglasan municipal mayor Hon. Renante V. Inocando [representanti sa mga mayores],  nga maoy mamuno sa pagpangita o pag-negotiate ngadto sa mga suppliers nga andam makahatag ug gikinahanglang bakuna sa probinsya sa mas labing dali nga panahon. Gilauman nga karong adlawa, Agosto 5, 2021, magpahigayon ug meeting ang mga nanganlang opisyal ug department heads kauban si Gov. Zubiri aron masabutan ug masugdan na ang mga lakang sa pagpalit ug COVID-19 vaccines.

###