Press Release No. 165

August 9, 2021

GIPANINGKAMOTAN ni Provincial Governor Jose Ma. R. Zubiri, Jr. nga mahuptan ang mahinungdanon papel nga gisalig kaniya sa katawhan isip amahan sa Bukidnon nga mihatag sa gahum nga buhaton ang mga angayang gimbuhaton ug makuha ang katuyuan sa usa ka lokal nga kagamhanan nga mahimong patas ug mogasto nga maalamon sa salapi. Sa tuyo nga mahimong organisado ug adunay sistema diha sa pagpadagan sa lokal nga gobyerno, gipabarug ni Governor Zubiri ang nagkalain-lain nga administration buildings nga gigastuhan sa kinatibuk-ang kantidad ₱306,500,000.00 gikan sa tuig 2001 hangtud sa tuig 2021.

Subay sa infrastructure supports nga gabayan sa maayong pagdumala, gipanglantaw nga ang administration buildings maoy kapasikaran sa paghatud sa mga serbisyo ngadto sa katawhan. Sa 20 ka mga lungsod sa Bukidnon, kinse (15) ka mga Local Government Units ang napatukoran sa administration buildings sa Provincial Government of Bukidnon (PGB), nga gilangkuban sa mosunod: LGU-Baungon nga gipondohan sa kantidad ₱40-million; LGU-Cabanglasan – ₱21-million; LGU-Don Carlos – ₱29-million; LGU-Kalilangan – ₱17,500,000.00; LGU-Libona – ₱34-million; LGU-Pangantucan – ₱21,500,000.00; LGU-Quezon – ₱31-million; LGU-San Fernando – ₱20-million; LGU-Sumilao – ₱20-million; ug LGU-Talakag – ₱23-million; Migahin usab ug pondo ang PGB alang sa rehabilitation sa admin buildings sa LGU-Damulog nga gigahinan sa kantidad ₱30-million; LGU-Kitaotao – ₱10-million; laing pondo alang sa counterpart sa PGB sa admin buildings sa LGU-Kibawe – ₱5-million; LGU-Lantapan – ₱3,500,000.00;ug LGU-Maramag – ₱1-million, diin ang dakong pondo niini gikan sa congressional office kaniadto ni Senator Juan Miguel “Migs” Zubiri.

Nahatagan usab ug pondo ni Governor Zubiri sa iyang pangatungdanan isip kongresista sa tersiero distrito ang mga lungsod sa Kadingilan, Damulog ug Kitaotao, alang sa katukoran sa administration buildings niini. Samtang ang tulo ka mga LGUs sa Dangcagan, Impasugong, ug Malitbog natukod sa dili pa ang administrasyon ni Governor Zubiri, ug ang administration building sa LGU-Manolo Fortich napabarug gikan sa congressional fund sa unang distrito sa Bukidnon.

Ang administrasyon ni Governor Zubiri gitugbangan sa paningkamot ug sakripisyo sa mga miyembro sa Sangguniang Panlalawigan, mga mayores ug uban pang piniling opisyal, mga empleyado ug sa katawhan sa lalawigan sa kinatibuk-an nga nagtrabaho sa labing episyenti, padulong sa gitinguha nga kalinaw, kahusay ug maayong pagdumala nga magpaayo ang ekonomikanhong kalihukan, kalagsik sa kalikopan ug pagpadayon alang sa kaayohan ug epektibo nga lokal nga gobyerno nga nagahatag sa kinatibuk-ang kalidad sa panginabuhi sa iyang katawhan.

###