Press Release No. 167
August 11, 2021
MAPASALAMATON si Commission on Population and Development- Region 10 Regional Director Neil Aldrin G. Omega ngadto kang Bukidnon Provincial Governor Jose Ma. R. Zubiri, Jr., pinaagi sa usa ka recorded video material, gumikan sa makanunayong suporta niini sa mga nasyunal nga kalihukan sa maong buhatan, ilabi na sa family planning diin ang probinsya usa sa mga top performing provinces nga nag-implementar sa maong programa sa atong nasud, atol sa gipahigayon nga Family Planning Month Celebration and Covenant Signing, kagahapong adlawa, Agosto 10, 2021 sa Loiza’s Pavilion, Brgy. Casisang, Malaybalay City, Bukidnon.
Taliwala sa pandemyang dala sa COVID-19, gibutyag ni RD Omega nga nagkataas usab ang ihap sa unwanted pregnancies ilabi na sa mga kabataan, maternal mortalities ug gender-based violence sa mga urban areas. Ang pagsaulog sa family planning month nagpahinumdom sa mga magtiayon sa pagsunod sa hustong pagplano sa pamilya ug kabaskog sa ilang panglawas. Ang tema karong tuiga nga “Usap Tayo sa Family Planning” naghatag ug kahigayonan sa matag pamilya nga mahisgutan ug ma-promotar ang ka-importante sa family planning sa ilang tagsa-tagsa ka pamilya.
Nanawagan usab si RD Omega sa mga kadagkuan sa LGU’s nga ipadayon ang mga programa sa family planning ug dili tugutan nga mabalda ang mga serbisyo niini luyo sa mga nahitabong quarantine aron maundang ang pagkuyanap sa maong virus.
Gidayeg usab ni Governor Zubiri pinaagi ni provincial administrator Atty. Jay S. Albarece ang mga kawani sa PGO-Population Development Division sa ilang mga paningkamot nga mapaabot ang saktong edukasyon sa pagplano sa pamilya ngadto sa mga tagsa-tagsa ka munisipyo ug barangay sa atong probinsya luyo sa nahitabong pandemya sa atong nasod.
Human sa hamubong programa gipahigayon ang covenant signing sa mga nagkalain-laing ahensya sa gobyerno sa pagpanguna ni Gov. Zubiri, isip pagsaad sa kinatibuk-ang suporta sa pagpaimplementar ug pagpromotar sa “Responsible Parenthood and Reproductive Health (RPRH) Law of 2012” sugod sa tuig 2022 ug sa musunod pang mga katuigan.
Ang maong kalihukan gitambungan ni Governor Zubiri, Regional Manager for Mindanao USAID ReachHealth Mr. Edgardo B. Catalan, Kapisanan ng mga Broadcaster sa Pilipinas (KBP) President Mr. Gino Armstrong Garcia ug mga representante sa Provincial Health Office, Department of Health-Bukidnon, Municipal Health Officers, Municipal Population Program Officers, Philhealth, Sangguniag Kabataan-Bukidnon ug mga kawani sa PGO-Population and Development Division-Bukidnon, nga gipangunahan ni Population Program Officer IV- Emily Marie Q. Estacio.
###
