Press Release No. 166

August 11, 2021

GIPANGSUNOG ug gipangguba sa mga kawani sa Provincial Detention and Rehabilitation Center (PDRC) sa pagpanguna ni assistant warden Nelson Rocky A. Balaba ang mga nakompiskang mga kontrabando sa sulod sa selda sa mga Persons Deprived Of Liberty (PDL) sa PDRC.

Lakip nga gipangsunog ug gipangguba nga mga kontrabando ang 106 ka mga cellphones nga lain-lain ug mga brand, 89 ka mga cellphone batteries, 50 ka mga simpack, 64 ka mga lighters, 29 ka mga cellphone chargers, electrical wires nga gibana-banang moabot sa 30 ka metros, improvised deadly weapon sama sa mga kutsilyo ug mahait nga butang, 18 ka mga tresbe nga sigarilyo nga stick ug 70 ka stick nga linikit nga tresbe.

Matud pa ni asst. warden Balaba nga ang maong mga kontrabando nga nakumpiska gipahigayon sa random inspection sa tibuok bulan sa Hulyo ning tuiga. Ang mga kontrabando matud pa ginagamit kini sa mga illegal nga transaksyon sa mga PDL sa ilang kontak sa gawas sa rehabilitasyon diin hugot kini nga gi-dili sulod sa maong buhatan. Kamulo pa usab ang imbistigasyon sa mga kawani sa PDRC kung asa nakuha ang mga kontrabando luyo nga walaý gipahigayon nga dalaw sa mga PDL.

Aron matubag ang kamingaw sa mga PDL sa ilang pamilya, gitugutan ang mga PDL nga makatawag sa hustong oras gamit ang cellphone sa PDRC apan kinahanglan kining mag-logbook aron mahibaw-an kung kinsa ang ilang mga gitawagan. Nagpadayon usab ang mga paugnat sa kusog sa sulod sa maong buhatan sama sa dulang basketball, volleyball, zumba ug daghan pang uban aron mapabilin ang kahimsog sa panglawas sa mga PDL.

Aron usab hapsay ang pagpadagan sa sulod sa PDRC, hugot nga gi-dili ang pagpahigayon sa sugal ug pag-inom sa ilimnong makahubog sa mga jail guard sulod sa PDRC. Gidili usab ang pagsulod sa mga empleyado sa maong buhatan kon dili schedule niini nga mag-duty ug striktong pagrekisa sa mga kagamitan sa dili pa kini musulod ug mogawas sa maong buhatan. Mapasalamaton usab si Balaba sa amahan sa probinsya sa Bukidnon nga si Bukidnon Provincial Governor Jose Ma. R. Zubiri, Jr. sa padayon niining suporta ilabi na sa mga panginahanglanon sa PDL ug mapabiling hapsay ang pagdumala niini.

Ang pagpangsunog ug pagpangguba sa mga kontrabando sinaksihan sa mga representante sa media, Provincial Administrator’s Office, PGO-PAIA, PDRRMC ug mga kawani sa maong buhatan kaganihang hapon, Agosto 11, 2021 atubangan mismo sa PDRC compound, Brgy. Natid-asan, Malaybalay City, Bukidnon.

###