Press Release No. 169

August 18, 2021

Kakulangon sa bed capacity sa mga hospitals ug pagkapuno sa mga isolation facilities alang sa mga nagpositibo sa COVID-19 ang nag-unang mga problema sa mga mayores sa ilang tagsa-tagsa ka mga munisipyo ug syudad. Kini ang usa sa nahisgutan sa gipahigayong Provincial COVID-19 Task Force Emergency Meeting kaganihang buntag, Agosto 18, 2021 sa Kaamulan Open Theater, Kaamulan Park, Malaybalay City sa pagpanguna ni Bukidnon Provincial Governor Jose Ma. R. Zubiri, Jr. kauban si PCL President- Ex-Officio Board Member Atty. Oliver Owen P. Garcia ang Co-Chairman sa task force kauban si provincial health officer Dr. Gary Guido C. Tabios, Jr.

          Aron maminusan ang maong problema, nadesisyonan sa mga mayores ug sa mga membro sa maong task force nga pagadalhon sa Bukidnon Provincial Medical Center (BPMC) ang mga aduna’y severe o grabe nga kaso sa COVID-19 ug sa mga nailing mga hospital pinaagi sa “One Hospital Command Center.” Samtang magpabilin ang mga adunay kaso nga mild ug moderate nga nagpositibo sa COVID-19 sa ilang tagsa-tagsa ka munisipyo ug syudad nga atimanon usab kini sa ilang tagsa-tagsa ka mga isolation centers.

     Gipaabot ni Gov. Zubiri nga migahin siya ug ₱188 million ngadto sa mga 8 ka pampublikong hospital sa Bukidnon lakip na niini ang Bukidnon Provincial Medical Center (BPMC) sa Malaybalay aron mapalapdan ug madugangan pa ang ilang kapasidad sa pagdawat ug pasyente sa COVID-19. Samtang laing ₱600 million nga pondo ang igahin ni Governor Zubiri aron ipang-apod apod sa matag munisipyo sa probinsya nga gamiton sa mga kakulangon sa pagsumpo ug pagbatok sa COVID-19.

          Sa nahimong report ni Dr. Tabios, sa data as of August 17, 2021 sa 9:00 sa buntag, adunay 1,637 ang active cases, 11,343 ang nakarekober, 203 ang namatay diin mikabat na sa 13,183 ang kinatibuk-ang natala nga kumpirmadong kaso sa tibouk probinsya sa pagsugod sa COVID-19. Sa natala nga population sa probinsya nga 1,518,750, nabutang sa high risk ang classification sa Bukidnon gumikan sa kapaspason sa pagdaghan sa nagpositibo sa maong virus sulod lamang sa pipila ka adlaw.  Nag-una sa natala nga high risk ang mga munisipyo sa Manolo Fortich, Maramag ug Malitbog lakip na niini ang dakbayan sa Valencia, samtang anaa sa critical ang dakbayan sa Malaybalay ug lungsod sa Quezon. Sa tala usab sa nabakunahan as of August 16, 2021, adunay 130,168 ang completely vaccinated samtang 101,648 ang naka-1st dose vaccine.

          Magpabilin usab sa MGCQ ang tibouk probinsya sa Bukidnon human naaprobahan sa mga membro sa task force aron mahatagan ug higayon ang mga katawhan nga makatrabaho ug makapahigayon sa ilang mga negosyo apan kinahanglan nga magsunod sa striktong pagpatuman sa health protocols sa Department of Health (DOH). Dinhi, hugtanong gihangyo ni Gov. Zubiri ang mga mayores nga seryosohon ang pagbatok sa COVID-19 sa ilang mga munisipyo ug syudad, ug labaw sa tanan, ang pag-ampo sa kahitas-an kay mao lamang kini matud pa ang solusyon nga masumpo ang maong virus.

          Ang maong panagtigum gitambungan sa mga mayores ug mga representante sa 20 ka lungsod ug 2 ka syudad, municipal health officers, provincial disaster risk reduction and management officers, ug nilang DILG-Bukidnon Provincial Director Carmelo Enrique B. Libot, provincial administrator Atty. Jay S. Albarece, Provincial Budget Officer Fe Retuertas ug PDRRMO IV Israel Johan M. Damasco Jr.

###