Press Release No. 171
August 20, 2021
NABAKUNAHAN ang 132 ka mga Persons Deprived of Liberty (PDL) sulod sa Provincial Detention and Rehabilitation Center (PDRC) aron malikay sa makapatay nga virus sa COVID-19, subay sa gipanghingusgan ni Provincial Governor Jose Ma. R. Zubiri, Jr., kaniadtong Agosto 19, 2021 sa Natid-asan, Brgy. Casisang, Malaybalay City, Bukidnon.
Sa impormasyon nga gipadangat ni PDRC Assistant Warden Nelson Rocky A. Balaba, 132 ka mga PDL ang nabakunahan sa 1st dose sa Sinovac vaccine nga gilangkuban sa mga senior citizen, mga adunay co-morbidities ug mga trusties nga mga sinaligan sulod sa maong prisohan diin 17 niini mga babae ug 115 ka mga lalaki sa total nga natala nga 1,011 nga mga PDL nga anaa kasamtangan sa sulod.
Gipaningkamotan ni Governor Zubiri nga mabakunahan ang tanang mga empleyado ug mga jail guard sulod sa PDRC aron malikayan nga mamahimong courier sa maong virus. Gipaabot na usab sa PDR ang request ngadto sa buhatan sa City Health Office sa dakbayan sa Malaybalay aron magahinan pa ug dugang bakuna hangtud nga mabakunahan ang tanang mga PDL sa PDRC.
Nagpabilin gihapon ang mga nakaskedyul nga pampahimsog sa panglawas nga mga kalihukan sa mga PDL sulod sa PDRC sama sa basketball, volleyball, zumba ug daghan pang uban ilabi na ang pagpa-init sa adlaw aron magpabilin silang himsog ug halayo sa sakit.
Ang maong pagpamakuna gipangunahan sa City Health Office sa Malaybalay, pinaagi nila Dr. Melirose Deticio ug Dr. Dennis Bryan Paega, kauban ang 12 ka mga personahi nga naggikan sa Department of Health (DOH).
###
