Press Release No. 172

August 25, 2021

MALIPAYONG gidawat sa Local Government Unit sa Damulog ang gi-turnover nga administration building nga gipondohan gikan sa Provincial Government of Bukidnon (PGB), pinaagi sa gipahigayon nga Blessing and Turnover Ceremony niadtong Agosto 25, 2021 sa Damulog Municipal Hall, Barangay Poblacion, Damulog, Bukidnon.

Sa pakigpolong ni Municipal Mayor Melino L. Buro isip end-user, dako ang pagpasalamat niini kang Governor Jose Ma. R. Zubiri, Jr. sa dinaliang pagtubag sa iyang hangyo nga mapabarug pagbalik ang ilang balay-pagpanerbisyo sa katawhan human kini masunog sa kalayo niadtong Hunyo 7, 2019. Kung makita man karon ang kaanindot ug paspas nga paglambo sa ilang lungsod sa Damulog kini gumikan sa kanunay nga paglantaw ug pagtabang ni Governor Zubiri, uban nila Senator Juan Miguel “Migs” Zubiri ug Congressman Manuel “Manoy” Zubiri, kinsa mihatag katumanan sa kaniadto pangandoy lamang sa katawhan sa maong lungsod.

Gipadangat usab ni Governor Zubiri ang iyang bug-os sa kasing-kasing nga pagpasalamat sa katawhan nga padayong misalig kaniya sulod sa 32 anyos niini nga pagpanerbisyo sa publiko. Gipasigarbo sa gobernador ang kooperasyon sa katawhan sa Bukidnon sukad sa iyang pagpangatungdanan nga kanunay mopatalinghog sa iyang pagpasabot sa ensaktong pagtakda sa mga prioridad ug maalamon nga paggahin sa pondo gikan sa panudlanan sa kagamhaan.

Gawas sa administration building, natuman usab pinaagi sa pagpondo sa PGB ang proyektong imprastraktura sa Damulog, sama sa public market building, public terminal, municipal gymnasium, ingon man ang mga mejoras sa 17 ka mga barangay niini.

Ang rehabilitasyon sa administration building sa Damulog gigahinan sa kinatibuk-ang 30-milyones ka pesos sa PGB, diin gi-aprubahan ang notice to proceed niini nga proyekto niadtong Enero 10, 2021 sulod sa 420 ka mga adlaw angayang mahuman, pinaagi sa contractor nga Mafil Builders, Inc.

###