Press Release No. 176

August 27, 2021

SAULUGON sa Provincial Government of Bukidnon (PGB) ang simpleng selebrasyon sa ika-107 niini nga annibersaryo sa pagkamugna isip probinsya nga nagtangag sa temang “Galing ng Bukidnon ngayon, sandigan ng pagbangon”, nga pagapangunahan ni Bukidnon Provincial Governor Jose Ma. R. Zubiri, Jr. sa umaabot Septembre 1, 2021 sa Kaamulan Park, Capitol Compound, Malaybalay City, Bukidnon.

Unang bahin sa programa mao ang pagpahigayon sa ecumenical prayer nga pagapangunahan nilang Rev. Fr. Alfred Delfino- Chancellor sa dyosesis sa Malaybalay, Bae Inatlawan Adelina D. Tarino nga magrepresentar sa atong mga igsoong mga Indigenous People ug ni Imam Zubair Langilao nga magrepresentar sa atong mga igsoong Muslim sa alas 6:30 sa buntag. Kini pagasundan sa flag raising ceremony sa atong national flag nga pagapangunahan nilang Brigadier General Ferdinand T. Barandon, P.A., Brigade Commander sa 403rd Brigade, Philippine Army ug ni Police Colonel Jun Mark J. Lagare, Provincial Director, PNP-Bukidnon. Musunod gilayon ang raising of the provincial, city and municipal flags uban sa pagpatugtog sa Provincial Hymn diin kini pagapangunahan ni Governor Jose Ma. R. Zubiri, Jr. Vice-Governor Rogelio N. Quiňo uban sa mga mayores sa 20 ka lungsod ug duha ka syudad.

Human niini mao ang video presentation kabahin sa kasaysayan sa probinsya sa Bukidnon ug ang mga kalambuan ug kabag-ohan niini. Gilauman nga mohatag usab sa iyang mensahi si Governor Zubiri sa pagsaulog sa anibersaryo sa Bukidnon. Sa ikaduhang hugna, ipahigayon ang santos nga mesa sa Kaamulan Open Theater, Kaamulan Park, Malaybalay City, Bukidnon sa alas 8:00 ang takna sa buntag sa pagpanguna ni Rev. Fr. Alfred Delfino. Ipahigayon usab ang blood letting activity sa susamang venue sa alas 9:00 ang takna sa buntag nga pagapangunahan sa Philippine National Red Cross.

Gipili ni Governor Zubiri nga mamahimong simple lamang ang maong pagsaulog gumikan sa pagsunod sa health protocols sa Department of Health nga gidili ang pagpahigayon sa dagkong mga kalihukan nga pagatambungan sa bagang duot sa katawhan aron kini malikay nga matakbuyan sa makamatay nga COVID-19. Gipahimangnuan usab ang mga motambong nga magsuot sa facemask ug face shield, striktong ipatuman ang social distancing ug kanunay nga manghugas o magbutang ug alcohol sa mga kamot.

###