Press Release No. 177

September 1, 2021

EMOSYONALnga mihatag si Provincial Governor Jose Ma. R. Zubiri Jr. sa iyang mensahe atol sa gipahigayon nga flag raising ceremony sa ika-107 nga kasaulogan sa kasumaran sa probinsya, karong adlawa, Setyembre 1, 2021, atubangan sa Kapitolyo Probinsyal, syudad sa Malaybalay, Bukidnon.

Simpli apan mabulukong gipaabot ni Governor Zubiri ang iyang dakong pagpasalamat ngadto na sa tanang mga opisyales, mga empleyado ug ilabi na ngadto sa mga katawhan sa lalawigan nga nahimong kaabag sa Pangagamhanang Probinsyal sa pagkab-ot sa kalambuan ug kabag-ohan sa Bukidnon sulod sa 18 ka tuig sukad pa man sa iyang unang termino nga paglingkod isip Gobernador sa tuig 2001.

Gisaysay usab ni Governor Zubiri nga wala siya maghandom nga moabot ang adlaw nga siya mamahimong usa ka pulitiko sanglit ang iyang pag-anhi sa Bukidnon sa tuig 1971 alang man sa pagpaila sa pagpananom ug tubo aron mamahimong usa sa panginabuhian sa mga katawhan sa Bukidnon. Apan tungod sa iyang dakong pagmahal sa katawhan, misugal siya sa pagsalmot sa pulitika sa tumong nga mas mapalapdan pa niya ang iyang pagserbisyo ngadto sa katawhan sa Bukidnon. Natagamtaman niya ang iyang kadaugan tungod sa suporta sa katawhan isip Assembly Man sa tuig 1984-1986, nagpadayon isip Congressman sa ika-tulong distrito sa tuig 1987- 1998 ug nahimong Gobernador sa tuig 2001-2010, Vice-Governor sa tuig 2010-2013 ug mibalik pagka-Gobernador sa tuig 2013 hangtud sa kasamtangan.

Sa pagbalik-lantaw ni Governor Zubiri sa iyang unang termino isip Gobernador, dakong hagit kini matud pa kaniya tungod kay ang probinsya sa Bukidnon ana man sa ika-78 nga ranking sa mga probisya, bout pasabot ika-tulo nga pinakbore sa nasud Pilipinas, apan sa hinay-hinay ug tungod sa pagpaningkamot sa iyang administrasyon inubanan sa tanang opisyales, empleyado ug katawhan, nakab-ot karon sa probinsya ang kadungganan isip ika-lima nga pinakasapian nga probinsya sa tibuok nasud alang sa tuig 2018 ug 2019, kung aha gihandom usab ni Gov. Zubiri nga mapadayon pa kini nga kadungganan sa umaabot pa nga mga katuigan.

          Isip katapusang mensahe ni Gov. Zubiri sa anibersayo, gipasalig niya nga bisan dili na siya maglingkod isip Gobernador, ipadayon niya ang iyang pagtabang ug pagserbisyo ngadto sa tanang nanginahanglan kaniya ilabi na niadtong pinakakabus nga hut-ong sa katilingban.

Ang maong kasaulogan gitambungan sa mga mayores, Sangguniang Panlalawigan nga gipangunahan ni Vice Governor Rogelio N. Quiño, PG Departments/Division heads, kauban nila Col. Jose Arn M Real, 403rd Deputy Brigade Commander ug PCol Jun Mark J Lagare, Provincial Director, PNP-Bukidnon Provincial Police Office, diin hugot nga gi-obserbahan ug gipatuman ang minimum public health protocols.

###