Press Release No. 178

September 6, 2021

DAKONG pagpasalamat sa kagamhanan ang gipadangat sa katawhan sa Barangay Lirongan, Talakag, Bukidnon sa hingpit nga pagsugod sa proyekto sa dalan, nga mao ang katumanan sa saad ni Presidente Rodrigo Roa Duterte, pinaagi sa Executive Order No. 70 nga hiniusang pag-aksyon sa kagamhanan sa pagsulbad sa ugat sa insurhensiya nga mao ang kapobrehon.

Sa pakigpolong ni Punong Barangay Regelito Deconlay, nawala ang kabalaka sa iyang gisankupang katawhan sa dihang gipahigayon ang Groundbreaking Ceremony niadtong Setyembre 2, 2021 sa Local Access Roads sa duha ka mga sitio sa Barangay Lirongan nga mao ang Pawagaon – sa pagsemento sa 577 meters road length, kantidad ₱13-million; ug Kaulayanan – sa pagsemento sa 230 meters road length, kantidad ₱7-million. Kini bisan pa man sa nasinati karon nga pandemya, apan anaa andam nga mohatud sa serbisyo ang mga opisyal ug representante sa nasudnong pangagamhanan nga dugay na usab nila gihandum ug karon matuman na gayud ang pag-ayo sa ilang dalan. Gipakisayud usab ni Mr. Christian Dave Talian, residenti sa maong barangay, ang ilang kasinatian sa lisod nga dalan kung aha maglisod sila kung adunay mga emehensya, ingon man ang kalisdanan kung adunay pagbaha.

Gipaabot ni provincial administrator Atty. Jay S. Albarece, kinsa mao ang nag-representar kang Governor Jose Ma. R. Zubiri, Jr., ang kalipay nga lakip ang Bukidnon sa makapahimulos sa Local Government Support Fund – Support to Barangay Development Program (LGSF-SBDP) ni President Duterte, diin kinatibuk-ang 107 ka mga proyekto ang nakalinya nga ipatuman diha sa 71 ka mga barangay sa katorse (14) ka mga LGUs sa Bukidnon, lakip ang duha ka mga syudad, nga adunay gibana-bana nga ₱1.420-billion.

Pinaagi sa SBDP, napaubos sa sunod-sunod nga Community Support Program sa kasundaluhan nga nag-operate sa Bukidnon ang pag-ila sa maong mga proyekto, particular sa 403rd Brigade, 4ID, Philippine Army, kung aha mihimo kini sa pakig-koordinar sa katawhan sa barangay aron makuha kung unsa ang mga nag-una nilang panginahanglan, ug sa pagsubay sa Retooled Community Support Program sa DILG.

Gibutyag ni DILG Regional Director Arnel M. Agabe, CESO III nga malauman nga walay mabiyaan nga barangay pinaagi sa EO 70, ilabi na kadtong nasudlan sa communist terrorist group, tungod kay naka-andam ang kaangayan nga tabang gikan sa national government nga ipatuman sa kagamhanang probinsyal, pinaagi sa pakigtimbayayong sa local government units niini nga magpakita usab kung unsa ang pagpangga sa mga lomolopyo sa barangay.

Hangyo ni Talakag Municipal Mayor Vergito O. Factura sa mga molopyo sa Barangay Lirongan nga tabangan sila nga ma-ampingan ug maprotektahan ang maong proyekto alang sa hingpit nga pagkab-ot sa malungtarong kahusay ug kalinaw sa ilang barangay.  

###