Press Release No. 179

September 6, 2021

GISUGDAN na sa pagpatuman ang usa (1) sa katorse (14) ka mga proyekto ubos sa Local Government Support Fund – Support to Barangay Development Program (LGSF-SBDP) sa lungsod sa Cabanglasan, Bukidnon, pinaagi sa gipahigayon nga Groundbreaking Ceremony sa Rehabilitation / Improvement of Farm to Market Road and Construction of Barrel (2.4m x 2.4m) sa Sitio Malinao, Barangay Canangaan, Cabanglasan, Bukidnon, niadtong Setyembre 3, 2021.

Sa kantidad nga 11-milyones ka pesos, hayan ma-semento ang 420 meters road length ingon man ang pagtukod sa flood control and drainage structure sa Sitio Malinao, diin makabenepisyo usab ang lima ka mga sitio sa Barangay Canangaan, sanglit kini man ang nag-unang dalan aron mahatud ang ilang mga abot nga produkto sa umahan padulong sa kamerkaduhan.

Gipasabot ni Brigadier General Ferdinand T. Barandon, commander sa 403rd Brigade, 4ID, Phillipine Army nga angayang dili mahadlok ang mga lomolopyo kung makita ang kasundaluhan sa ilang lugar tungod kay naningkamot kini nga makuha kung unsa ang mga gikinahanglang serbisyo gikan sa gobyerno, pinaagi sa Community Support Program, aron nga mahatagan usab ug solusyon, pinaagi sa Executive Order No. 70 ni Presidente Rodrigo Duterte o ang Whole-of-Nation Approach nga matuldokan ang problema sa insurhensya sa nasud, kauban ang pag-abag sa Philippine National Police.

Hangyo ni DILG Regional Director Arnel M. Agabe, CESO III nga magtinabanga sa pag-amping sa mga proyekto nga ipatuman sa matag barangay tungod kay kini mao ang katumanan sa saad ni Presidenti Rodrigo Duterte nga ihatud sa mga suok nga barangay ang serbisyo sa kagamhanan, pinaagi sa pagpatuman niini sa kagamhanang probinsyal ug sa pagtimbayayong sa local nga mga kagamhanan niini.

Ang SBDP projects gilangkuban sa mga local accress roads, health stations, water systems, school buildings ug solar dryers, kung aha dinhi sa Bukidnon katorse (14) ka mga LGUs ang mabubu-an sa mga proyekto nga mao ang lungod sa Cabanglasan, Dangcagan, Impasugong, Kitaotao, Lantapan, Malitbog, Manolo Fortich, Pangantucan, Quezon, San Fernando, Sumilao, ug Talakag, lakip ang duha ka mga syudad sa Valencia ug Malaybalay. Moabot sa 107 projects ang nakahan-ay nga ipatuman sulod sa 50 ka mga barangay sa mga municipal government nga ipatuman sa PEO.

Mensahe ni Cabanglasan Municipal Mayor Renante V. Inocando sa katawhan nga kini pamatuod sa gobyero sa tiunay ug tinud-anay nga serbisyo, sulod sa administrasyon ni President Duterte busa angayang maghiusa ug magtinabangay alang sa kalambuan sa katawhan.

Gipasalamatan ni provincial administrator Atty. Jay S. Albarece, kinsa nag-representar kang Governor Jose Ma. R. Zubiri, Jr., ang nasudnong kagamhanan nga wala malimtan ang Probinsya sa Bukidnon niini nga mga proyekto sa kalambuan sa LGSF-SBDP, ug ingon man gihatagan usab niini ug gimbug-aton ang gihuptan nga trabaho sa kasundaluhan ug kapulisan sa lalawigan. Gipaabot usab ni Atty. Albarece ang gipadangat nga mensahe ni Governor Zubiri nga “dili gayud siya mobiya ug mo-undang sa pagserbisyo sa katawhan sa Bukidnon, samtang siya buhi pa.”

###