Press Release No. 180

September 7, 2021

MALIPAYONG gidawat sa mga Person’s Deprive of Liberty (PDL) ang mga kagamitan para sa ilang livelihood gikan sa Pangagamhanang Probinsyal sa Bukidnon sa pagpanguna ni Gov. Jose Ma. R. Zubiri, Jr. pinaagi sa Provincial Agriculture Office kaniadtong Septembre 2, 2021 didto sa Natid-asan, Brgy. Casisang, Malaybalay City, Bukidnon.

Gidawat sa 55 ka mga kababayen-an nga PDL ang mga beads sa nagkalain-laing kolor, mga dagom ug tanod, ug mga binhi sa kamatis, ampalaya, pipino, talong, okra, pechay, sitaw, kangkong, 5 ka sako nga vermi cast, 10 ka sako nga ete sa manok, 1 ka pack nga antracol (fungicide), J777 organic foliar fertilizer, bloomer, hand sprayer (1 gallon capacity), pala nga gamay (spade tool) ug piko (grab hoe).

Mapasalamaton usab kaayo ang mga PDL sa ilang nadawat ngadto sa kagamhanang Probinsyal sa Bukidnon pinaagi ni Gov. Zubiri gumikan kay dako kaayo kini ug tabang alang kanila ug wala sila pasagdi bisan pa man anaa sila sa sulod sa maong rehabilitasyon ilabi na sa kalisod sa panahon karon tungod sa pandemya nga dala sa COVID-19.

Pamahayag ni Provincial Agriculturist Engr. Alson G. Quimba atol sa gipahigayong hamubong programa nga tumong sa ilang pagpanghatag sa kagamitan sa livelihood ngadto sa mga kababayen-ang PDL mao ang pagtabang kanila sa ilang panginabuhian ug mapalambo ang ilang abilidad samtang anaa pa sila sa sulod sa PDRC ug makatabang sa ilang mga panginahanglanon.

Samtang migahin ug luna ang mga nagdumala sa PDRC sa pagpanguna ni Officer-in-Charge Niel John E. Tabios ug Assistant Provincial Warden Nelson Rocky A. Balaba aron pagatamnan sa mga binhi sa mga utanon ug mopahigayon usab ug mga training kung unsaon ang paghimo sa mga beads. Gibutyag usab ni assistant warden Balaba nga aduna naý naghulat nga mga order sa beads samtang ang mga utanon ila kining magamit sa dugang sa pagkaon sa sulod sa PDRC aron magpabiling himsog ang ilang panglawas.

###