Press Release No. 181

September 8, 2021 

SINTO PORSYENTO (100%) o kumpleto na ang mga kahimanan sa biomolecular laboratory ug nakahan-ay na ang tanan lakip na niini ang mga ekipo ug kagamitan. Kini ang nahimong update ni Dr. Miguel Antonio Prantilla, FICS, FPSMSI- Chief of Hospital sa Bukidnon Provincial Medical Center (BPMC) sa status sa gitukod nga biomolecular laboratory ngadto sa hawanan sa Sangguniang Panlalawigan (SP) atol sa gipahigayong 107th regular session sa 26th SP kaniadtong Septembre 7, 2021 sa Capitol Compound, Malaybalay City, Bukidnon human kini giimbitahan ni 2nd Legislative District board member Atty. Nemesio B. Beltran, Jr.

Sigon ni Dr. Prantilla nga mipahigayon na usab sila ug calibration sa mga ekipo aron masiguro nga mogana ang tanan ug wala’y damyos niini diin moabot ngadto sa 500 ka mga sample ang pwede maakomodar niini sa 1st shift sulod sa usa ka adlaw ug kung madugangan ug 2nd shift, makaakomodar kini ngadto sa 1,000 ka sample. Aron mamahimong pormal na nga magamit ang maong biomolecular laboratory, gibutyag ni Dr. Prantilla nga kulang na lamang ang pagpirma sa memorandum of agreement (MOA) tali sa Provincial Government of Bukidnon (PGB) sa pagpanguna ni Gov. Jose Ma. R. Zubiri, Jr. ug sa Northern Mindanao Medical Center (NMMC) sa dakbayan sa Cagayan de Oro. Naghangyo na usab sila sa buhatan sa gobernador nga direktang makighinabi sa kompanya nga mukolekta sa mga toxic ug hazardous waste sa maong laboratoryo. Kung maaprobahan na kini, ipahigayon ang pag-inspeksyon sa Department of Health nga mao usab ang mohatag sa License to Operate (LTO) aron makasugod na sa operasyon ang maong laboratoryo diin gilauman nga mabuksan karong bulana.

  Gibutyag ni Board Member Beltran nga kinahanglan mapadali ang pagbukas sa maong laboratory gumikan kay purhisyo matud pa sa katawhan sa Bukidnon ang paghulat sa resulta sa COVID-19 RT-PCR tungod kay dalhon pa kini sa dakbayan sa Cagayan de Oro ug maghulat pa gikan sa 3 hangtud 5 ka adlaw ayha mahibaw-an sa usa ka pasyente kung kini negatibo o positibo sa maong virus. Aduna usaý higayon nga makarekober na lamang ang usa ka pasyente gikan sa isolation facility ayha pa mahibaw-an ang iyang resulta.

Mipahibalo usab si Dr. Prantilla sa mga membro sa SP nga sa kasamtangan puno na ang gialokar nga bed capacity sa BPMC para sa mga pasyente sa COVID-19 ug sobra gatos pa ang naa sa waiting list. Gidasig usab niini ang tanan nga magpabakuna batok sa maong virus gumikan kay sa kasamtangan, 92% nga naadmit sa maong buhatan nga adunay kaso sa COVID ang walay bakuna samtang 7% lamang niini ang naadmit nga nabakunahan.

###