Press Release No. 182

September 9, 2021 

“DILI tanan nangamatay sa ilang tagsa-tagsa ka panimalay gumikan sa COVID-19”, kini ang gipasabot ni Bukidnon Provincial Health Officer Dr. Gary Guido C. Tabios, Jr. sa mga membro sa Sangguniang Panlalawigan atol sa gipahigayong 107th regular session sa 26th SP kaniadtong Septembre 7, 2021 sa Capitol Compound, Malaybalay City, Bukidnon human kini gipangutana ni 2nd Legislative District board member Atty. Nemesio B. Beltran, Jr.

Usa sa mga hinungdan matud pa ni Dr. Tabios nga kasagaran puno na ang mga hospital ug ang uban mahadlok nga magpa-admit gumikan kay mahadlok nga matakbuyan sa makamatay nga virus. Kadaghanan usab sa mga nangamatay sa ilang panimalay aduna na’y daan nga co-morbidities o aduna nay sakit daan diin kini nahimong complicated lamang gumikan sa kakulangon sa kahimanang medikal sama sa high blood pressure, stroke, heart attack, diabetes ug daghan pang uban. Nahimo lamang kining COVID-19 suspek gumikan kay kasagaran sa mga nangamatay aduna kini sintomas sa maong virus sama sa ubo ug hilanat nga maoy isulti sa mga tagtungod. Wala usab gi-deny ni Dr. Tabios nga anaa gihapon nangamatay nga kumpirmado sa COVID-19 apan napugos nga magpaayo sa ilang panimalay kay puno na ang mga hospital ug mga isolation facilities.

        Mihatag usab ug update si DILG Bukidnon Provincial Director Carmelo Enrique B. Libot kabahin sa mga contact tracers sa probinsya sa Bukidnon diin bag-o pa lamang niining gi-renew ang ilang mga kontrata. Sa kasamtangan adunay 106 ka mga contract tracers sa tibuok probinsya nga nabahin sa mga munisipyo ug syudad; Baungon-4, Cabanglasan-3, Damulog-2, Dangcagan-3, Don carlos-6, Impasug-ong-2, Kadingilan-2, Kalilangan-3, Kibawe-4, Kitaotao-3, Lantapan-5, Libona-7, Malaybalay City-10, Malitbog-3, Manolo Fortich-8, Maramag-7, Pangantucan-5, Quezon-4, San Fernando-4, Sumilao-5, Talakag-5, Valencia City-7, Provincial Health Office-3 ug DILG Provincial Office-1.

        Luyo sa gidaghanon sa mga contract tracers, kulang pa kini tungod kay sila maoy mangita sa mga nahalubilo sa mga nagpositibo sa COVID-19. Gihangyo usab niini ang mga mayores sa munisipyo ug syudad nga magdugang ug gahinan ug dugang pundo aron matubag ang kakulangon niini. Gipresenta usab ni PD Libot ang mamahimo unyang granular lockdown nga ipaimplementar diin dili na ideklarang ECQ, MECQ, GCQ ug MGCQ ang usa ka probinsya, munisipyo o syudad, apan magsugod na lamang ang quarantine status sa usa ka panimalay nga natakbuyan sa maong virus hangtud moabot kini sa purok ug barangay kon ugaling modaghan ang matakbuyan sa COVID-19 sa tumong nga dili maapektuhan ang dagan sa ekonomiya sa usa ka dapit.

###