Press Release No. 184

September 10, 2021

GIPADANGAT sa mga chief of hospital sa Bukidnon Provincial Hospitals, lakip ang Bukidnon Provincial Medical Center (BPMC), ug sa mga representante sa pribadong ospital sa lalawigan ang kakulang sa supply sa oxygen nga mao ang sarang gikinahanglan sa mga pasyenti, kinsa natakbuyan sa COVID-19 virus nga anaa sa ilang mga pasilidad. Kini ang usa-usa nga gipaabot sa mga doktor sa tigum sa Provincial COVID-19 Task Force nga gidumala ni provincial health officer Dr. Gary Guido C. Tabios. Jr., kagahapong adlawa, Setyembre 9, 2021 sa Kaamulan Open Theater, Kaamulan Park, syudad sa Malaybalay.

Gipasabot ni BPMC chief of hospital Dr. Miguel Antonio C. Prantilla nga kung walay oxygen ang lawas, ang tanan nga hinabang sa mga doktor, pinaagi sa mga tambal, mamahimong kawang lamang.

Sa samang hisgutanan, gipahigayon usab kagahapong adlawa ang Bids and Awards Committee (BAC) meeting diin gipatawag ang Pryce Gases, Inc. sa Tagoloan, Misamis Oriental, kinsa mao ang supplier sa medical oxygen sa walo (8) ka mga Bukidnon Provincial Hospitals (BPH), lakip na ang BPMC. Sa requirement alang sa usa ka quarter, gikinahanglan ang supply sa 7,422 medical oxygen nga adunay kantidad ₱5,196,400.00.

Gipahibalo ni provincial general services officer Atty. Nestor E. Cajes, Jr. nga 60% lamang sa panginahanglanon sa BPH ang mapasalig sa supplier nga ma-deliver karong panahuna, gumikan kay sila usab ang ga-supply sa uban pang syudad ug probinsya sa Northern Mindanao ug sa uban pang bahin sa nasud, ilabi na ning panahon sa health emergency. Apan gipakisayud sa Pryce Gases, Inc. nga malauman nga sa sunod bulan, mosaka ngadto sa 80% ang ilang supply sa medical oxygen.

Gipaningkamotan usab sa Provincial Government of Bukidnon, pinaagi ni Governor Jose Ma. R. Zubiri, Jr., nga hingpit matukod ang Oxygen Generator Plant diha sa COVID-19 Center sa BPMC nga maka-alagad sa 15 beds sa severe to critical cases sa maong ospital, nga gilantaw usab nga makatabang sa panginahanglanon sa uban pang ospital pag-abot sa panahon.

###