Press Release No. 186

September 14, 2021

PAGASUGDAN na ang implementasyon sa Executive Order No. 70 o Whole of nation approach ni President Rodrigo R-Duterte, pinasikad sa Local Government Support Fund- Support to Barangay Development Program (LGSF-SBDP) nga dugay na usab gihandum sa katawhan, human sa napahigayon nga Groundbreaking Ceremony kagahapong adlawa-Setyembre 13, 2021 sa Sitio Bagalangit, Barangay Kalugmanan, Manolo Fortich, Bukidnon.

Tulo ka mga proyekto ang gi-andam sa kagamhanan alang sa Barangay Kalugmanan nga mao ang mosunod: construction sa school building (1 unit 1 classroom) sa kantidad nga ₱1,200,000.00 nga naglakip na sa comfort room, complete doors and windows ug uban pang kagamitan, diin gilantaw nga maghatag sa pagtulo-an sa 50 ka mga daycare pupils sa maong barangay; construction of 1.3 kilometers farm to market road sa kantidad nga ₱15,800,000.00, kung aha 128 ka mga households ang gilauman nga mapagaan ang ilang panginabuhian tungod sa pag-ayo sa dalan; ug ang Agriculture, Livelihood and Technical/Vocational trainings/projects nga adunay ₱3,000,000.00 nga gigahing pondo alang sa paghasa sa kahibalo sa pagdumala sa coffee production ug cattle dispersal.

“Sulod sa taas nga katuigan, masugdan na gayud ang among gipangandoy nga kalambuan”, pamahayag ni Punong Barangay Hernando G. Daluan sa dihang mipadangat kini sa iyang testimonya kabahin sa mga programa ug proyekto nga ibubo sa iyang barangay gikan sa LGSF-SBDP alang ning tuig 2021. Tungod sa sensirong pamunuan, hayan mapasayon ang pagbiyahe nila sa ilang mga abot sa umahan. Gipasalamatan usab ni Datu Carlo Luaynon, sitio leader sa Sitio Bagalangit, ang programa sa kagamhanan sa paghatag higayon sa ubang molopyo sa ilang dapit nga makabalik sa sabakan sa gobyerno ug makasugod sa bag-ong kinabuhi uban ang ilang pamilya.

Isip representanti ni Provincial Governor Jose Ma. R. Zubiri, Jr., gipaabot ni provincial administrator Atty. Jay S. Albarece ang kinasing-kasing nga pagpasalamat sa administrasyong Duterte tungod kay nahilakip ang probinsya sa Bukidnon sa gipahigayon nga taas ug makuti ng pagsusi sa kahimtangan sa mga barangay, diin kinatibuk-ang 71 ka mga barangay sa lalawigan ang matukoran sa nagkalain-laing infrastructure projects nga adunay kinatibuk-ang ₱1,420,000,000.00 nga budget allocation gikan sa LGSF-SBDP CY 2021.

Gipadangat usab ni Municipal Mayor Clive D. Quiño sa Manolo Fortich ang iyang pagdayeg sa administrasyon ni Presidenti Duterte tungod kay na-swertihan ang ilang lungsod, particular ang Barangay Kalugmanan, nga malakip sa talagsaong ideya nga maabtan sa mga proyekto nga gipondohan sa nasudnong pangagamhanan.

Gibutyag ni DILG Undersectary for Local Government Marlo L. Iringan sa katawhan nga kini usa ka hiniusa nga lihok sa gobyerno nga gi-partisiparahan sa mga nasudnong ahensya, sa pakigtimbayayong sa mga lokal nga kagamhanan, aron kahatagan ug tubag ang gipaabot nga nag-unang issues and concerns sa mga resident sa kabaranggayan, subay sa Community Support Program sa Philippine Army, nga nahasubay usab sa Retooled Community Support Program sa DILG.

###