Press Release No. 188

September 20, 2021

PAGHATAG-katumanan sa dugay nang gipangandoy sa katawhan ang nag-unang tumong sa Local Government Support Fund-Support to Barangay Development Program (LGSF-SBDP) diha sa kabaranggayan sa lungsod sa Dangcagan, Bukidnon nga nagsumikad sa positibong pagdawat sa mga residenti sa kasundaluhan sa dihang gipatuman ang Community Support Program (CSP) niadtong tuig 2019.

“Dili gubat, apan pagkolekta sa mga nag-unang kakulangon ug problema sa barangay ang tuyo sa kasundaluhan sa pagpatuman sa CSP sa among barangay kaniadto,” kini ang giluwatang pamahayag ni Punong Barangay Brendo G. Balonquit sa Barangay Kapalaran, Dangcagan, Bukidnon atol sa gipahigayon nga Groundbreaking Ceremony alang sa pag-ayo sa dalan ug pagpalapad sa water system sa maong barangay, niadtong Setyembre 15, 2021.

Gipaambit usab ni Bae Elgie Mandacayan, usa sa mga benepisyaryo sa mga proyekto nga dako kaayo kining tabang sa ilang adlaw-adlaw nga pagkinabuhi diin kaniadto mag-antos sila sa pagbaklay sa lapukon, danlog ug sobra ka-daot nga dalan, bitbit ang ilang mga abot sa umahan padulong sa merkado, ug ingon man ang pag-antos sulod sa taas nga panahon nga magsag-ob sa tubig sa atabay nga kung mobundak ang ulan, molubog ug maglisod sila sa pagkuha sa tubig nga sarang gagamiton sa ilang tagsa-tagsa ka mga panimalay. Tungod niini nga pagtuman sa dugay na nilang gihandum nga proyekto sa ilang barangay, kinasing-kasing nila kining gipasalamatan sa administrasyon ni Presidenti Rodrigo Duterte nga nakatukod sa inisyatiba sa SBDP. Sumala niini nga bisan pa man sa pandemya tungod sa COVID-19, wala mapugngan ang mga lumilihok sa gobyerno nga ihatud sa ilang layo nga lugar sa Dangcagan ang mga proyekto, timaan nga wala sila gikalimtan ug gipasagdan.

Isip representanti ni Provincial Governor Jose Ma. R. Zubiri, Jr., gipaabot ni provincial administrator Atty. Jay S. Albarece ang kinasing-kasing nga pagpasalamat sa administrasyong Duterte tungod kay nahatagan niini ug pagtagad ang mga panginahanglan sa hilit nga mga barangay nga uhaw sa mga proyekto, sama sa Barangay Kapalaran ug Barangay Osmeña sa Dangcagan.

Gipaabot usab ni Municipal Mayor Fruto B. Dandasan, Jr. ang iyang dakong pasalamat nga natuman ra gayud ang gihaguan nga pag-proseso sa mga dokumento alang sa maong mga proyekto, pinaagi sa RCSP core teams nga gilangkuban sa national government agencies sama sa DILG, AFP ug PNP, provincial/municipal/barangay government alang sa pagtuman sa mandu sa hiniusang lihok sa kagamhanan, subay sa Executive Order No. 70 ni President Duterte diin naka-angkla ang National Task Force to End Local Communist Armed Conflict (NTF-ELCAC).

Alang sa lungsod sa Dangcagan, unom (6) ka mga programa o proyekto nga adunay kinatibuk-ang kantidad nga ₱40-million ang nakahan-ay nga ipatuman nga mao ang mosunod: sa Barangay Kapalaran, Dangcagan – Road Upgrading with 0.3 km from Purok 1A to Purok 1A, nga nagkantidad ug ₱3,700,000.00; Road Upgrading with 0.9 km from Purok 1A to Purok 4, nga nagkantidad ug ₱11,300,000.00; Expansion of Water System with 200 cubic meter high ground reservoir, kantidad ₱5,000,000.00 diin kinatibuk-ang 1,563 ang populasyon nga makapahimolos niini. Samtang sa Barangay Osmeňa – Road Upgrading sa 0.6 km sa Secondary highway to Purok 2, nga nagkantidad ug ₱7,500,000.00; Road Upgrading with 0.6 km Secondary Highway to Purok 1, nga nagkantidad ug ₱7,500,000.00; ug Expansion of Water System with 200 cubic meter high ground reservoir, kantidad ₱5,000,000.00, alang sa 1,640 population sa maong barangay.

###