Press Release No. 189

September 20, 2021

GILAUMAN nga hingpit makab-ot ang kalambuan sa ekonomikanhong kalihukan sa pito (7) ka mga barangay sa lungsod sa Quezon, Bukidnon nga polos beneficiary-barangays sa Local Government Support Fund-Support to Barangay Development Program (LGSF-SBDP) nga gitagan-an sa kantidad ₱140-million pesos sa nasudnong pangagamhanan, pinasikad sa Executive Order No. 70 ni Presidenti Rodrigo Duterte nga naghatag katumanan sa mga programa ug proyekto nga natumbok sa Community Support Program (CSP) sa AFP.

Sumala ni Municipal Mayor Pablo M. Lorenzo, III nga ang pagsemento sa mga dalan sa nagkalain-laing barangay sa iyang lungsod usa sa mga butang nga buot niini nga mapadayon tungod kay usa kini ka dalan nga adunay kapa-ingnan, dalan nga maghatag-kinabuhi sa ekonomikanhong kalihukan sa Barangay Delapa, ingon man sa Barangay Cawayan, Barangay Kipaypayon, Barangay Linabo, Barangay Lipa, Barangay Palacapao, ug Barangay Santa Felomina.

“Walay presidenti sa nasud sukad nga nakahatag ug sama niini ka-dako nga kantidad sa proyekto sa su-ok nga barangay, busa angayang ipaabot gayud namo ang among dakong pagpasalamat sa gobyerno kay dili na kami maglisod sa pag-deliver sa among abot nga saging, mais, tubo ug cassava didto sa sentro”, mensahe-pasalamat ni Punong Barangay Larry G. Dacquiado sa gipahigayon nga Groundbreaking Ceremony sa pagsemento sa farm to market roads sa Barangay Delapa, Quezon, Bukidnon niadtong Setyembre 16, 2021.

Gibutyag ni Regional Director Arnel M. Agabe, CESO III sa DILG Region X nga kini ang panahon nga atong daugon ang giyera pinaagi sa maayong pagdumala sa pangagamhanan. Unang higayon matud pa kini nga inisyatiba sa presidenti sa nasud nga matabangan ang pinakahilit nga barangay sa nasud pinaagi sa NTF-ELCAC ug gihangyo ang katawhan nga tabangan ang gobyerno nga ma-ampingan ang proyekto nga gihatag aron mapahimuslan sa mosunod nga henerasyon.

Pinaagi sa pagpatuman sa kasundaluhan sa CSP, natumbok sa mga opisyales sa barangay uban sa mga residenti niini ang issues and concerns, partikular ang lisod nga dalan sa nanganlang mga barangay ug ang multi-purpose drying pavements.

Base sa record sa Provincial Engineer’s Office nga gipangunahan ni Provincial Engineer Albert D. Yulo, ang probinsya sa Bukidnon, adunay kinatibuk-ang ₱1,420,000,000.00 gikan sa LGSF-SBDP alang sa 14 ka mga Local Government Units sa probinsya (LGU-Talakag, Cabanglasan, Manolo Fortich, Dangcagan, Quezon, Sumilao, San Fernando, Kitaotao, Malitbog, Pangantucan, Impasugong ug Lantapan, lakip ang Malaybalay City ug Valencia City alang ning tuig 2021 diin gilangkuban sa mga infrastructure projects nga pagsemento sa farm to market roads, health stations, school buildings, local access roads, water system, ingon man ang livelihood projects / trainings.

“Tungod niini nga mga programa sa nasudnong pangagamhanan, hayan makab-ot ang malungtaron nga kalinaw ug malangkubon nga kalambuan sa nasud. Dili matukid nga kalipay ug dakong pagpasalamat ang atong ipaabot sa administrasyon ni Presidenti Duterte nga gihatagan niini ug bili ang mga suok nga barangay”, mensahe ni provincial administrator Atty. Jay S. Albarece, kinsa nag-representa kang Provincial Governor Jose Ma. R. Zubiri, Jr. sa maong okasyon.

###