Press Release No. 190

September 20, 2021

GIPAABOT sa mga punong barangays sa beneficiary-barangays sa lungsod sa Sumilao, Bukidnon ang ilang kinasing-kasing nga pagpasalamat sa na-panahon nga pag-abot sa pwersa sa kasundaluhan sa ilang mga barangay, alang sa pagpahigayon sa Community Support Program (CSP) sa pagsunod sa kamanduan nga nalatid sa Executive Order No. 70 ni President Rodrigo Duterte diin namugna ang National Task Force to End Local Communist Armed Conflict (NTF-ECAC).

Ang CSP naghatag kanila sa higayon nga mapadangat ang kakulangon ug mga yangongo sa barangay sulod sa taas nga panahon alang sa implementasyon sa Support to Barangay Development Program (SBDP) gikan sa nasudnong pangagamhanan.

“Tungod sa tabang sa mga sundalo, nawala ang among kakulba kay nagtoo kami nga aduna na usab kagubot, apan ila kaming gitabangan. Mapasalamaton kami nga hingpit na gyud nga masugdan ang gihaguan namo nga mga dokumento busa akong pasalamat sa mga ahensya sa gobyerno nga nagtabang kanamo,” unod sa mensahe ni Punong Mercy P. Mal-ing sa Barangay Lupiagan, sa pagpahigayon sa Groundbreaking Ceremony sa mga katukoran sa school building, farm to market road ug local access road niadtong Setyembre 17, 2021 sa Barangay Lupiagan, lungsod sa Sumilao.

“Dili matukib nga katingala ang gibati sa mga residenti sa among barangay sa Puntian sa dihang miabot sa dis-oras sa kagabhi-on ang mga sundalo sa ngadto sa barangay tungod kay na-monitor niini ang lihok sa rebelding grupo. Gumikan niini nga na-panahon nga pag-abot sa mga otoridad napugngan ang posebling pag-martsa-martsa sa pipila ka molopyo kauban ang walhong grupo,” tipik sa testimonya nga gipaabot ni Punong Barangay Tirso Amistoso sa Barangay Puntian.

Samtang bug-os sa kasing-kasing usab ang paghatag testimonya ni Punong Barangay Andronico Bulanta, “…sa implementasyon niining SBDP, nahatagan kami sa higayon nga mapaambit ang among mga problema dinhi sa among mga barangay ug tuod man, masugdan na gyud ang paghatag kasulbaran sa among problema sa dalan, kakulangon sa eskwelahan… Tungod niini nga pagtabang sa gobyerno kanamo, usa na kami karon ka malinawon nga barangay.”

Gipakisayud ni Assistant Regional Director Victor De Gracia sa Department of Education Region 10 sa katawhan sa tulo ka mga barangay sa Sumilao nga tumong sa okasyon sa seremonya aron sugdan ang mga proyekto dinhi, aron ipahayag ang panaghiusa sa tanan nga mga ahensya sa gobyerno ug sa lokal nga kagamhanan sa hiniusang lihok nga matabangan ang komunidad, human gihatagan ug bili ang mga napadangat nga isyu ug mga kabalaka sa nanganlang mga barangay.

Isip representante ni Provincial Governor Jose Ma. R. Zubiri, Jr., gipaabot usab ni provincial administrator Atty. Jay S. Albarece ang kanunay nga mensahe sa gobernador ngadto sa katawhan nga dili kini moundang sa pagtabang sa Bukidnon sa laraw nga hingpit makab-ot ang malungtarong kalinaw ug malangkubon nga kalambuan, gikan sa mga hilit nga barangay sa Bukidnon pa-ngadto sa mga syudad ug kalungsuran niini. Dakong ang kalipay sa kagamhanang probinsyal niini nga kalambuan nga hatud sa hiniusang lihok sa gobyerno alang sa labing nanginahanglan nga katawhan diha sa ka-baranggayan sa Sumilao, diin kinatibuk-ang ₱60-million pesos ang gatagana nga kantidad sa SBDP.

###