Press Release No. 195

September 30, 2021

MALAMPUSONG gipahigayon ang pagpamakuna sa 2nd dose sa 116 ka mga Persons Deprived of Liberty (PDL) sulod sa Provincial Detention and Rehabilitation Center (PDRC) samtang 310 ang nabakunahan sa 1st dose aron malikay sa makapatay nga virus sa COVID-19 bag-ohay pa lamang sa Natid-asan, Brgy. Casisang, Malaybalay City, Bukidnon.

Sa impormasyon nga gipadangat ni PDRC Assistant Warden Nelson Rocky A. Balaba, ang 116 ka mga PDL mao ang nabakunahan sa 1st dose sa Sinovac vaccine kaniadtong Agosto 19, 2021 nga gilangkuban sa mga senior citizen, mga adunay co-morbidities ug mga trusties nga mga sinaligan sulod sa maong prisohan. Tungod niini, mikabat na sa 45% ka mga PDL’s ang nabakunahan sa total nga natala nga 1,012 nga anaa kasamtangan sa sulod.

Kini subay sa paningkamot ni Governor Jose Ma. R. Zubiri, Jr. nga mabakunahan ang tanang mga empleyado ug mga jail guard sulod sa PDRC aron malikayan nga mamahimong courier sa maong virus. Gipaabot na usab sa PDRC ang request ngadto sa buhatan sa City Health Office sa dakbayan sa Malaybalay aron magahinan pa ug dugang bakuna hangtud nga mabakunahan ang tanang mga PDL sa PDRC.

Nagpabilin gihapon ang mga nakaskedyul nga pampahimsog sa panglawas nga mga kalihukan sa mga PDL sulod sa PDRC sama sa basketball, volleyball, zumba ug daghan pang uban ilabi na ang pagpa-init sa adlaw aron magpabilin silang himsog ug halayo sa sakit.

Ang maong pagpamakuna gipangunahan sa City Health Office sa dakbayan sa Malaybalay, sa pagpanguna ni Dra. Ann Michelle C. Go, kauban ang mga personahi nga naggikan sa Department of Health (DOH).

###