Press Release No. 194

September 30, 2021

PASALAMAT nga bug-os sa kasing-kasing ang hiniusang nabatbat sa unom ka mga punong barangay sa lungsod sa San Fernando, Bukidnon sa dihang hingpit nga pagasugdan ang proyekto nga ilang gihandum sulod sa taas na nga panahon pinaagi sa Groundbreaking Ceremony didto sa Barangay Bonacao, San Fernando, Bukidnon niadtong Setyembre 21, 2021.

Alayon sa Executive Order No. 70 ni Presidenti Rodrigo Duterte, unom ka mga proyekto sa local access roads alang sa mga barangay sa Bonacao, Dao, Halapitan, Kibongcog, Magkalungay ug Palacpacan ang nagahinan ug pondo sa NTF-Ending Local Communist Armed Conflict (NTF-ELCAC) nga mokabat sa kinatibuk-ang ₱120-million. Ang maong mga proyekto gilantaw nga maoy maghatag dalan sa aktibo ug himsog nga ekonomiya alang sa kalambuan sa mga residenti sa maong nga hilit nga barangay.

Gikalipay gayud namo ang nakita namo nga lihok sa gobyerno nga gidala gayud dinhi sa among layo nga mga barangay ang mga programa ug proyekto aron makab-ot ang kalambuan sa katawhan”, asoy ni Punong Barangay Lardy P. Hiponia sa Barangay Bonacao. Dugang pahayag niini nga kini nga mga proyekto mao ang resulta sa ilang kahago nga nakigtimbayayong sa kasundaluhan ug sa mga personahe sa mga ahensya sa gobyerno pinaagi sa Community Support Program.

Daghang mga presidenti na sa nasud ang nangagi apan si Presidenti Rodrigo Duterte lang ang nakakita sa kalisod sa among kinabuhi nga diin kaniadto magpas-an kami sa pagdala sa among mga produkto sa umahan ayha isakay sa katig diha sa suba aron madala kini padulong sa sentro aron mabaligya. Angayan lamang nga maningkamot na kita sa pagtrabaho tungod kay anaa naman ang pagtrabaho sa maayong kalsada”, testimonya ni Datu Damian Sulade, kinsa nagdala sa tingog sa mga kaubanang IPs sa ilang pagpaabot sa kalipay nga gituman gayud ang pasalig nga sila matabangan.

Gipaabot usab ni Municipal Mayor Levi C. Edma, Sr. ang iyang hugot nga apila ngadto sa mga ginsakupang molopyo sa lungsod nga tabangan ang gobyerno nga maaghat ang mga nahibiling naglihok pa sa New People’s Army (NPA) ug ipasabot nga ang gobyerno sa Pilipinas lamang ang bugtong naghatag kinabuhi alang sa kaugmaon sa kabataan, busa dili angayang magpadala sa lingla ug pasalig sa walhong grupo nga walay katumanan.

Ang supervision sa maong mga proyekto ipaubos sa Provincial Government of Bukidnon nga gipangunahan ni Governor Jose Ma. R. Zubiri, Jr. pinaagi sa Provincial Engineer’s Office.

###