Press Release No. 199

October 1, 2021

MIKABAT na ngadto sa 183,150 ka mga katawhan sa probinsya sa Bukidnon ang nabakunahan na batok sa COVID-19 as of September 29, 2021 basi sa datus nga gikan sa Department of Health (DOH) COVID-19 Bakuna Center Registry (CBCR). Kini ang nahimong kabahin sa report sa Provincial Health Office o PHO sa gipahigayong sinemana nga panagtigum sa mga membro sa COVID-19 Provincial Task Force nga gipangunahan ni Provincial Health Officer Dr. Gary Guido Tabios, Jr. kagahapong adlawa Septembre 30, 2021 didto sa Centennial Stage, Kaamulan Park, Malaybalay City, Bukidnon.

Sumala sa maong report nga 1,068,778 ang target population nga mabakunahan sa probinsya sa Bukidnon diin 139,817 ang nabakunahan na sa 2nd dose ug 43,333 ang nabakunahan sa Janssen Vaccine ug mi-total kini sa 183,150 ka mga indibidwal ang fully vaccinated diin ang percentage of fully vaccinated mikabat kini sa 17.14%.

Gibutyag usab sa Bukidnon-PHO nga as of September 29, 2021, 1,624 ang active cases sa COVID-19, 22,469 ang recovered, 390 ang deceased ug 24,482 ang total confirmed cases. Sa maong kaso, nag-una ang dakbayan sa Valencia nga adunay 403 ka kaso, nagsunod ang Malaybalay nga adunay 247 ka kaso ug ang lungsod sa Quezon nga adunay 244.

Sa nahimong report ni Dr. Kimberly Kay Huiso ang Operations Manager sa One Hospital Command Center (OHCC), nga sugod Septembre 1 hangtud 29, 2021, nakadawat sila ug 579 ka mga tawag, 400 ang nagpositibo sa Rapid Antigen diin 41 niini ang nabakunahan sa 1st dose, 24 niini ang fully vaccinated ug 335 ang wala nabakunahan o unvaccinated. Samtang 110 ang nagpositibo sa Reverse Transcription Polymerase Chain Reaction (RT-PCR) diin 15 niini ang nabakunahan sa 1st dose, 12 ang fully vaccinated ug 82 ang unvaccinated.

Sugod usab sa bulan sa Septembre 1 hangtud 29 ning tuiga, 168 ang naadmit sa mga hospital diin 21 niini ang nabakunahan sa 1st dose, 13 ang fully vaccinated ug 134 ang wala nabakunahan. Samtang 104 ang nakabsan sa ilang kinabuhi gumikan sa maong virus diin 3 niini ang nabakunahan sa 1st dose ug 3 usab ang fully vaccinated ug 98 niini ang wala nabakunahan.

Gihisgutan usab sa Provincial COVID-19 Task Force ang pagduso sa mga resolution no. 28 ug 29 kabahin sa pagdumala sa pagbalhin sa mga patay nga natakbuyan sa virus ug pag-regulate sa pagbaligya sa medical oxygen sa probinsya sa Bukidnon.

###