Press Release No. 198

October 1, 2021

PORMAL nga gibuksan sa mga kaigsoonang Indigenous People’s (IP’s) ang pagsaulog sa Indigenous Peoples Month sa tibouk bulan sa Oktubre pinaagi sa pagpahigayon sa usa ka ritwal didto sa Tulugan sa Kaamulan Park, Malaybalay City, Bukidnon karong adlawa Oktubre 1, 2021 nga pinangunahan sa mga datu ug bae sa Bukidnon-Tagoloanon Tribe.

Gibutyag ni Datu Balinao Virgilio Namoc nga ang IP Month Celebration basi kini sa Presidential Proclamation 486 ni Presidente Gloria Macapagal Arroyo kaniadtong tuig 1997 nga nagdeklara sa kada Oktubre 29 matag tuig nga “National Indigenous Peoples Thanksgiving Day” nga saulogon sa tibouk nasod. Tungod niini, mapasalamaton kaayo ang mga IP’s nga gihatagan sila ug higayon nga mapasidunggan sa nasyonal nga pangagamhanan, mahatagan ug pagtagad ang ilang kultura ug tradisyon ug mahatagan ug katungod nga magdumala sa ilang mga kayutaan o ancestral domain.

Matud pa ni Datu Mapawa Makatukaw Atty. Albert Lagamon nga lakip sa mga kalihukan ang Opening Ritual sa Tulugan sa Kaamulan Park, Malaybalay City ug Umayamnon Day nga gipahigayon kaganiha sa Miaray, Mandahican, Cabanglasan, Kuglong Festival nga ipahigayon sa Iglugsad, San Fernando, Bukidnon diin magsaulog ang Tigwahanon & Manobo Tribe sa Oktubre 8 hangtud 10, Talaandig Day nga saulugon sa Talaandig Tribe sa Oktubre 8 hangtud 16, Matigsalug Celebration IP Month nga saulogon sa Matigsalug Tribe nga ipahigayon sa Oktubre 22, Kidtabur nga saulogon sa Manobo Tribe sa umaabot Oktubre 25 hangtud 27 sa Pangantucan, Manobo Day nga saulugon sa Manobo Tribe didto sa Maramag sa Oktubre 27, Higaunon Day diin kamulo pa ang pagskedyul sa maong kalihukan ug Closing Ritual nga saulogon sa Bukidnon Tribe sa dakbayan sa Malaybalay sa Oktubre 31, 2021.

Mapasalamaton usab ang mga IP’s ngadto sa pangagamhanang probinsyal sa pagpanguna ni Provincial Governor Jose Ma. R. Zubiri, Jr. sa kanunay niining pagsuporta sa tanan nilang mga programa ug kalihukan ilabi na ning panahon sa pandemya nga dala sa COVID-19.

###