Press Release No. 197

October 1, 2021

KALINAW ang gidala sa mga kasundaluhan sa 8th Infantry Battalion nga nasundan sa tropa ubos sa 1003rd Battalion sa Armadong Kusog sa Pilipinas sa pagsulod nila sa mga barangay sa lungsod sa Kitaotao, Bukidnon aron ipatuman ang Community Support Program (CSP).

“Giangkon namo nga kaniadto, hilabihan ka-gubot ang among barangay tungod kay dili man gayud malilong nga adunay galihok sa walhong grupo nga ania sa among komunidad. Hangtud nga nakaabot ang mga sundalo nga nag-ila usab sa among mga kulturanhong pamaagi ug andam mosunod sa pamatasan nga among naandam ayha ipatuman ang ilang kalihukan nga CSP”, pagsugid ni Punong Barangay Namakotse L. Manpudian, Sr. sa Barangay Digongan, Kitaotao, Bukidnon sa ilang kasinatian sa implementasyon sa CSP atol sa gilusad nga Groundbreaking Ceremony alang sa upat (4) ka mga proyekto, kaniadtong Setyembre 22, 2021.

Sumala ni Kapitan Manpudian, sukad kaniadto, siyam ka bulan human masugdan ang pakigtimbayayong sa mga sundalo nga makuha ang mga nag-unang isyu ug kabalaka sa barangay, hinay-hinay usab nga mibalik sa sabakan sa gobyerno ang pipila sa ilang mga paryenti nga midapig sa NPA.

Gipaambit usab sa usa ka barangay official ang ilang pag-alsa masa kaniadto batok sa mga mapugsanong buhat sa NPA sa Barangay White Kulaman, gani gikasubo nila ang panglantaw kaniadto sa katawhan sa ilang barangay isip usa ka slaughter area.

Tungod sa sakripisyo ug paningkamot sa mga sundalo, mapasalamaton ang mga barangay sa Digongan, Panganan, White Kulaman ug Kiulom, tanan sakop sa Kitaotao, Bukidnon nga hingpit nakit-an sa gobyerno ang ilang mga kabalaka, gani pagasugdan na usab ang pagpatuman sa mga proyekto alang sa kalambuan ug kausaban sa ilang mga kinabuhi.

Subay sa Executive Order No. 70 ni Presidenti Rodrigo Duterte, ang nanganlang upat (4) ka mga barangay nagahinan sa kinatibuk-ang ₱80-miilion nga pondo alang sa katukoran sa farm to market roads, ubos sa suporta sa Barangay Development Program sa NTF-Ending Local Communist Armed Conflict.

Ang E.O. No 70 o Whole of nation approach, usa ka hiniusang lihok sa kagamhanan nga naglambigit sa mga ahensya sa nasudnong pangagamhanan ug sa local government units aron hingpit matuldokan ang problema sa insurhensya sa nasud. Tinguha niini nga magahinan sa pondo sa nasudnong pangagamhanan ang mga kakulangong serbisyo sa mga suok o hilit nga mga barangay sa nasud nga sarang nasudlan sa rebelding grupo, ug kini ipatuman sa Provincial/City Government Units.

###