Press Release No. 202

October 4, 2021

HATAGAN sa katumanan sa nasudnong pangagamhanan, pinaagi sa Executive Order No. 70 sa gobyerno sa Pilipinas, ang katorse ka mga proyekto nga dugay nang gipangandoy sa siyam ka mga barangay sa lungsod sa Lantapan, Bukidnon, alayon sa natigayon nga Groundbreaking Ceremony sa Barangay Bantuanon, niadtong Setyembre 28, 2021.

Kini nga mga proyekto resulta sa pagtuman sa hiniusang lihok sa kagamhanan alang sa Local Government Support Fund-Support to Barangay Development Program (LGSF-SBDP) nga naka-angkla sa NTF-Ending Local Communist Armed Conflict. Pinaagi sa Retooled Community Support Program (RCSP) core team, natumbok ang mga kinahanglanong serbisyo o proyekto sa lungsod sa Lantapan nga gilangkuban sa pagsemento sa local access roads, katukoran sa barangay health center ug school building, ingon man ang potable water supply system nga nagtangag sa kinatibuk-ang kantidad ₱180-million pesos alang sa mosunod nga mga barangay: Alanib, Bantuanon, Songco, Victory, Cawayan, Capitan Juan, Kibangay, Kulasihan ug Basak.

Sa pakigpolong ni Municipal Mayor Ernie R. Devibar, gipadayag niini ang kalipay nga wala pakyasa sa nasudnong kagamhanan ang paghatag importansya sa mga proyekto alang sa kabaranggayan sa Lantapan.

“Dako kining tabang sa among lungsod, sanglit naila man kami nga usa sa mga nag-unang vegetable basket sa Northern Mindanao. Among dakong pasalamat sa administrasyon ni Presidenti Rodrigo Duterte niini nga mga proyekto tungod kay dili lamang katumanan sa gipangandoy nga kalinaw sa among komunidad ang mahatag niini, apan lakip na ang kalambuan sa pamuyo sa mga mag-uuma sa siyam (9) ka mga barangay”, mensahe nga gipaabot ni Mayor Devibar ngadto sa mga representante sa mga ahensya sa national government uban sa mga kawani sa pangagamhanang probinsyal sa Bukidnon nga gipangamahan ni Governor Jose Ma. R. Zubiri, Jr.

Mahinumduman nga ang NTF-ELCAC mitagana sa kinatibuk-ang ₱1,420,000,000 alang sa insurgency cleared barangays sa katorse (14) ka mga local government units sa Bukidnon nga gilangkuban sa Talakag, Cabanglasan, Manolo Fortich, Dangcagan, Quezon, Sumilao, Kitaotao, Malitbog, San Fernando, Pangantucan, Lantapan ug Impasugong, lakip ang mga syudad sa Malaybalay ug Valencia.

###