Press Release No. 201

October 4, 2021

GIDAYEG ug gipasalamatan sa katawhan sa lungsod sa Pangantucan, Bukidnon ang gobyerno tungod sa paningkamot niini nga pakighimamat, pinaagi sa hiniusang lihok sa Executive Order No.70 ni Presidenti Rodrigo Roa Duterte, subay sa gipahigayon nga Groundbreaking Ceremony sa upat ka mga proyekto alang sa Barangay Adtuyon ug New Eden niadtong Setyembre 24, 2021.

Sa pakigpolong ni Punong Barangay Franklin H. Pabericio sa Barangay Adtuyon sa maong okasyon, gipadayag niini nga nakita gayud nila ang pakigduol ug pakighimamat sa gobyerno sa katawhan sa ilang barangay.

“Pinaagi sa grupo sa mga ahensya sa nasudnong pangagamhanan ug sa pangagamhanang probinsyal sa Bukidnon nga nidangat dinhi sa among barangay, nakita namo nga sensiro ug seryoso ang atong gobyerno nga kami matabangan nga matubag ang mga nag-unang problema ug kabalaka dinhi sa among barangay”, pamolong ni Punong Barangay Pabericio.

“Kalipay nga dili matukib ang among gibati karon. Tungod sa kagamay sa among barangay, dili gayud namo makaya nga ipaayo ang among dalan nga kami lang”, mensahe-pasalamat usab ni Punong Barangay Armando V. Agudo sa Barangay New Eden.

 Gipamahayag ni Municipal Mayor Miguel A. Silva, Jr. nga bug-os sa kasing-kasing sila nga nagpasalamat kang Presidenti Rodrigo Duterte tungod kay wala kini mihunong sa pagpangita ug paagi nga mahiusa ang mga Pilipino ug kini legasiya nga mabiyaan sa lider sa nasud nga matunol ug masugdan ang mga proyekto nga nagtinguha sa makab-ot sa malungtarong kalinaw ug malangkubon nga kalambuan.

Sa data sa Provincial Engineer’s Office, kinsa mao ang gitahasan sa project implementation sa LGSF-SBDP sa LGU-Municipalities sa Bukidnon, kinatibuk-ang ₱40-million ang nakatagana sa lungsod sa Pangantucan, particular sa Barangay Adtuyon ug New Eden, alang sa pagsemento sa pipila ka road sections ug ang katukoran sa Level III potable water supply sa Sitio Mapait, New Eden, Pangantucan, Bukidnon.

###