Press Release No. 200

October 4, 2021

HINGPIT na nga mapatuman ang mga tabang nga suporta sa Barangay Development Program nga naumol pinaagi sa pagpahimutang sa Executive Order Numero 70 (E.O. No. 70) o Whole – of – Nation approach aron tapuson ang lokal nga komunista sa armadong pakig-away.

Sumala ni Provincial Administrator Jay S. Albarece atol sa Groundbreaking Ceremony niadtong Setyembre 23, 2021 nga usa lamang kini ka gamay nga mga proyekto kung ikumpara sa mga dagkong proyekto ubos sa Build Build Build Program sa kasamtangang administrasyon. Apan mapasalamaton ang lokal nga kagamhanan tungod kay nagpakita lamang kini nga sinsero ang gobyerno nga matabangan ang mga hilit nga mga barangay sa nasud, kung aha ang mga residenti mismo sa komunidad ang nag-ila aron matuldokan ang problema sa insurhensya nga nasinati sa ilang barangay.

“Gikalipay namo ug dako kini nga kalambuan tungod kay gihatud gayud mismo sa gobyerno dinhi sa among mga barangay ang serbisyo nga dugay na namong gihandum, ilabi na ang problema sa daut nga dalan. Gitinguha namo nga mapaaayo kini niadtong tuig 1990’s pa apan tungod sa kagamay ug kakulang sa pondo sa lokal nga kagamhanan sa Malitbog, dili gayud mapasemento ang among dalan”, paghatag-testimonya ni Punong Barangay German C. Sul-aron sa Barangay Kiabot, Malitbog, Bukidnon.

Alang sa mga residenti, “tungod niining pagtrabaho sa among dalan, hayan dili na gyud kami maglisod sa pagpagawas sa among mga produkto, dili na mabun-og ang among mga harvest, sama sa saging, ug mapalit kini sa ensakto nga presyo. Busa among dakong pagpasalamat sa gobyerno, kang Presidenti Rodrigo Duterte”, mensahe-pasalamat ni Kagawad Eleazar A. Asil.

Kinasing-kasing usab nga gipasalamatan ni Municipal Mayor Osmundo N. Dela Rosa ang mga representante sa nagkalain-laing ahensya sa nasudnong pangagamhanan, uban sa mga empleyado sa Provincial Government of Bukidnon nga gipangunahan ni Governor Jose Ma. R. Zubiri, Jr. gumikan sa koordinasyon ug kooperasyon nga mahatagan ug dalan ang hiniusang lihok sa gobyerno aron mapatuman ang mga proyekto alang sa lungsod sa Malitbog nga adunay kinatibuk-ang kantidad nga ₱60-million alang sa pag-ayo sa dalan sa tulo ka mga barangay sa Kiabo, San Luis ug Silo-o, tanan sakop sa Malitbog, Bukidnon.

###