Press Release No. 203

October 5, 2021

MALIPAYON ug mapasalamaton si Bukidnon Governor Jose Ma. R. Zubiri, Jr. sa hingpit nga pagbalik sa sabakan sa gobyerno sa dugang 30 ka mga former rebels (FRs) ug sa pagsalig aron makasugod sa bag-ong kinabuhi uban sa ilang tagsa-tagsa ka mga pamilya, atol sa virtual 2nd batch raffle alang sa 30 ka housing units nga nahimutang sa Barangay San Jose, syudad sa Malaybalay niadtong Setyembre 30, 2021.

Pinaagi ni provincial legal officer Atty. Paul Vincent G. Villegas, gipadangat niini ang mensahe ni Governor Zubiri sa maong okasyon, diin gipakisayud nga kini usa lamang sa daghan pang proyekto sa gobyerno alang kanila, pinaagi sa pakigtimbayayong sa kagamhanang probinsyal. Gihangyo sa gobernador nga ipaabot usab ang maayong balita ngadto sa mga kanhi kauban sa lihok, mamahimong maayong ehemplo, aron sila maaghat usab nga mobiya sa armadong pakigbisog ug mobalik sa sabakan sa gobyerno.

Kini hiniusang pwersa sa national government agencies, pinaagi sa National Housing Authority (NHA) Region 10, Department of the Interior and Local Government (DILG), uban ang kasundaluhan ubos sa 403rd Infantry Brigade, Philippine Army, ug sa Provincial Government of Bukidnon, alang sa katumanan sa Provincial Enhanced Comprehensive Local Integration Program (Provincial E-CLIP) sa Bukidnon.

Sa data gikan sa NHA, nasayran nga ang 30 nga dugang housing units magpuno kini sa nauna nga gi-raffle niadtong Pebrero 10, 2021 nga 100 ka rowhouse housing units diha sa AFP-PNP Pine Ville Project, diin adunay kaluagon sa 22 square meters floor area sa kantidad nga ₱450,000.00 matag balay, kung aha kinatibuk-ang 250 ka mga housing units ang anaa sa AFP-PNP Pine Ville Project.

Ang maong kalambuan resulta sa paningkamot sa Provincial E-CLIP sa Bukidnon, kinsa mao ang miila, mi-proseso ug nag-endosar sa mga kinahanglanon sa mga kanhi rebelde pinaagi sa evaluation ug validation.

Mahinumduman nga napahigayon ang ceremonial turn-over sa nasangpit nga housing units nga gipangunahan nila Secretary Jose Ruperto Martin M. Andanar, Cabinet Officer for Regional Development and Security (CORDS) Region X, uban nila regional manager Engr. Rolando I. Teves, Jr. sa NHA Regional Field Office 10, ug sa Provincial E-CLIP committee niadtong Disyembre 8, 2020.

###