Press Release No. 204

October 6, 2021

MALAMPUSONG nanumpa kang Provincial Governor Jose Ma. R. Zubiri, Jr. ang mga Board of Directors (BOD) sa bag-ong natukod nga Bukidnon Indigenous Peoples Unified Agriculture Cooperative (BIPUACO), dinhi sa Centennial Stage, Kaamulan Park, Malaybalay City, kaganihang buntag-Oktobre 6, 2021.

Sa pakigpolong ni Governor Zubiri sa maong okasyon, gipadayag niini ang iyang dakong kalipay nga malampusong nahugpong ang pito (7) ka tribu sa Bukidnon.

“Dako ang akong kalipay nga ani-a nahiusa kamo ug aduna na’y kusog ang kaigsoonang lumad sa Bukidnon, pinaagi niini inyong kooperatiba… alang sa inyong programa aron kamo makasugod, mogahin ako ug ₱25-million aron ika-suporta nato sa pito ka tribu sa atong probinsya”, tipik-pamahayag ni Governor Zubiri sa tigum sa mga datu ug bae sa lalawigan.

Gi-apila sa gobernador nga aron masugdan implementasyon sa mga programa ug proyekto alang sa mga IPs, isumite gilayon ang nakahan-ay nga mga programa sa kooperatiba sa BIPUACO aron matabangan sa kagamhanang probinsyal.

Ang pioneering BOD sa BIPUACO mao kining mosunod: Chairman – Datu Alex Payangga sa Manolo Fortich; Vice-Chairman – Datu Cosme Lambayon sa Kitaotao; ug Members sila Datu Ernie Calingasan sa Libona, Datu Adolino Saway sa Lantapan, ug Datu Seberia Diosdado sa Maramag. General Manager ug Chief Executive Officer usab si Provincial IPMR Datu Richard Dinlayan Macas.

Ang BIPUACO namugna isip usa ka kooperatiba nga maghatag sa mga oportunidad sa ekonomiya alang sa mga lumad diha sa natad sa kulturanhon ug tradisyonal nga paglambo pinaagi sa pag-organisar sa kahimoan sa agrikultura, pagproseso, ug pagbaligya sa mamahimong kapaninguhaan sulod sa yutang kabilin. Dinhi gipanglantaw nga mapalambo ang usa ka malungtaron nga BIPUACO nga maghatag sa malahutayon nga trabaho alang sa mga kaigsoonan nga anaa sa indigenous cultural communities / indigenous peoples (ICC/IPs), pinaagi sa mamugna nga kinitaan ug mga ekonomikanhong kalihukan sa natad sa agrikultura samtang padayon nga protektahan ang kulturanhong tradisyon sa pagkinabuhi.

Sigun ni Datu Richard Dinlayan Macas nga tinguha sa BIPUACO, kung aha opisyal nga namugna niadto lang Agosto 11, 2021, nga mahatagan ug gahum pinaagi sa mga aspeto sa socio, economic ug political ang IPs sa Bukidnon nga gilangkuban sa tribung Talaandig, Higa-onon, Bukidnon, Umayamnon, Matigsalug, Manobo ug Tigwahanon.

###