Press Release No. 207

October 11, 2021

MABUNGAHON nga na-diskusyunan ang gihan-ay nga Proposed Annual Investment Program (AIP) alang sa tuig 2022, nga naka-angkla sa Bukidnon Provincial Development and Physical Framework Plan (PDPFP) alang sa tuig 2020-2025,  sa gipahigayon nga Provincial Development Council (PDC) Meeting kaganihang buntag, Oktobre 11, 2021 sa Kaamulan Open Theater, Malaybalay City, Bukidnon.

Partikular nga gituki ang pondo nga nagahin sa 20% Development Fund nga naglakip sa pagpalit sa Fertilizers and Seeds Assistance, Rehabilitation and maintenance sa kinatibuk-ang 6,348.265 kilometers Barangay Roads sa probinsya sa Bukidnon ug ang padayong pagtukod sa housing units alang sa mga kabus nga pamilya, diin kinatibuk-ang ₱891,196,170.00 ang gitagana nga pondo alang sa maong mga katuyuan. Lakip sa nahisgutan ang pondo nga na-alokar alang sa provincial roads and bridges.

Gipadayag ni Provincial Governor ug PDC Chairperson Jose Ma. R. Zubiri, Jr. nga ang gisugyot nga tinuig nga plano sa pagpamuhunan mokabat ngadto sa ₱5,232,580,849.00 nga nagtimaan sa pinakataas nga budget sa Provincial Government of Bukidnon tungod sa mga sakripisyo sa mga provincial officials, mga mayores sa kalungsuran ug syudad, mga hepe sa departamento ug mga empleyado ug ang katawhan sa Bukidnon sa kinatibuk-an. Tungod niini, gidayeg sa gobernador ang tanan ug nanghinaut nga ipadayon ang nasugdan nga mga programa, proyekto ug mga kalihukan alang sa malahutayon ug malangkubon nga pagserbisyo sa katawhan sa lalawigan.

Tataw usab ang pagmaya sa gobernador uban sa mga mayor sa malampusong pagpatuman niini sa nagkadaiyang programa, subay sa Pillars of Good Governance diin ang poverty incidence among families sa probinsya sa Bukidnon, anaa na lamang sa 22.3% as of 2018 gikan sa 40.4% sa tuig 2006, pinasikad sa data gikan sa PSA-X-2018 RSET.

Gipasabot usab ni Engr. Jesrel B. Mangubat, EnP, Provincial Planning and Development Coordinator nga dili usa ka plano nga walay paingnan ang PDPFP tungod kay nagsumpay kini pangadto sa Regional Development Council, ingon man ngadto sa mga lokal nga kagamhanan sa Bukidnon nga gigiyahan sa malungtarong panglantaw sa probinsya nga nahi-uyon sa nasudnon nga direksyon.

Gumikan sa mabungahon nga diskusyon ug deliberasyon, gikumpirma sa PDC Full Council ang PDC Executive Committee Resolution No. 05-2021, nga naona na nga naaprubahan sa konseho niadtong July 27, 2021, kung aha miagi na usab kini sa Sangguniang Panlalawigan alang sa review and adoption. 

Sa kasamtangan, ang Bukidnon adunay 1,541,308 nga populasyon, sumala sa datus sa tuig 2020 sa 1,049,859 hectares – ika-upat nga largest land area sa nasud Pilipinas.

###