Press Release No. 208

October 12, 2021

MAHINANGPON nga gitunol sa Provincial Government of Bukidnon, pinaagi ni Provincial Governor Jose Ma. R. Zubiri, Jr. ang tabang-pinansyal, ingon man sa bugas ug canned goods, nga adunay kinatibuk-ang kantidad nga ₱750,000.00 alang sa 30 ka mga Former Rebels (FRs), nonot sa gipahigayon nga Presentation of Formers Rebels and Surrendered Firearms, kaganihang buntag-Oktobre 12, 2021 sa 403rd Infantry Brigade, Impalambong, Malaybalay City, Bukidnon.

Ang matag FR midawat sa tag-25,000 nga kantidad sa tseke gikan kang Governor Zubiri, tag-usa ka sakong bugas ug tag-usa ka cartoon sa canned goods, subay sa Financial and Food Assistance sa Pangagamhanang Probinsyal diin nagsumikad usab sa Provincial Enhanced Comprehensive Local Integration Program (E-CLIP) nga nagtinguha nga maabagan ang mga kanhi sakop sa Communist Terrorist Groups (CTGs), alang sa ilang pagsugod sa bag-ong kinabuhi uban sa ilang tagsa-tagsa ka mga pamilya.

Gipadayag ni Governor Zubiri ang iyang dakong kalipay sa nahimong desisyon sa 30 ka mga FRs nga mobalik sa sabakan sa balaod ug hugot niining giaghat ang tanan nga ipadangat ang iyang apila alang sa nahibilin sa kabukiran nga padayong naglihok batok sa gobyerno.

“Kitang tanan managsama nga Pilipino, dili dapat mag-away. Maghiusa kita busa tabangi ako ninyo nga aghaton ang nahibilin sa kalihukan nga mokanaug na aron sila usab makadawat sa susama nga hinabang nga inyong nadawat karon. Andam motabang ang gobyerno kaninyo”, mensahe nga puno sa amahanong paghigugma ang gipaabot ni Governor Zubiri atubangan sa 30 ka mga FRs, nga kadaghanan niini nag-edad 20 ngadto sa 30 anyos.

Sa panglantaw nga mahimong lig-on ang pagbag-o sa kinabuhi sa maong mga FRs, gipasalig niini nga mahatagan sa housing units ang 30 ka mga kanhi rebelde ug gani, gipadugangan usab niini ug tag-25,000 ang tabang-pinansyal nga naona na nilang gidawat, kini kung itugot sa mga gabayan nga gitakda sa balaod.

Sa maong ihap sa FRs, 12 niini ang nag-surrender ngadto sa 8th Infantry Battalion, 11 sa 88th Infantry Battalion, ug 7 sa Military Intelligence Company (MICO), kinsa naglihok sa syudad sa Malaybalay, Impasugong, Cabanglasan, San Fernando ug Quezon, tanan sakop sa Bukidnon, kung aha mikabat sa 25 ka armas ang gi-surrender timaan sa ilang pagbalik sa gobyerno (22 ang high powered ug 3 ang low powered).

Gibutyag usab ni Major General Romeo S. Brawner, Jr., commander sa 4th Infantry Division nga gikan sa pagpatuman sa kagamhanan sa E-CLIP sa tuig 2016, anaa na sa kinatibuk-ang 909 FRs ang na-enroll sa programa, diin 548 dinhi ang nakadawat na sa E-CLIP benefits (pabahay, livelihood assistance, job opportunities, scholarships alang sa ilang kabataan, firearms renumeration ug ang kahigayunan nga magkinabuhing malinawon uban sa ilang mahal sa kinabuhi) ug 361 usab niini ang kamulo pa gi-proseso ang mga dokumento alang sa funding sa nasudnong pangagamhanan.

###