Press Release No. 209

October 20, 2021

NAGMALAMPUSON ang gihimong pag turnover sa Iba Paglaum Housing sa Barangay Iba, lungsod sa Cabanglasan gikan sa Kagamhanang Probinsyal sa Bukidnon pinaagi sa opisina sa Provincial Real Estate Housing & Development Division karong adlawa, Mierkules petsa 20 ning bulan sa Oktubre 2021.

Mokabat sa 7.7 milyones ka pesos ang kinatibuk-ang kantidad ang nagasto gikan sa panudlan sa probinsya pinaagi sa prevention and mitigation program aron malikay ang 41 ka mga pamilyang lumad sa Sitio Marageng og Sitio Maenaga nga kanunay nakitaan sa peligro, panahon sa ting ulan.

Tungod sa kusganong hangyo sa opisyales sa Cabanglasan sa pagpanguna ni Mayor Renante Inocando gitubag sa gobernador ang ilang hangyo nga mabalhin og tukoran sa libreng panimalay ang mga nailang apektadong pamilya nga nahimutang karon sa Purok 9B, Barangay Iba, Cabanglasan, Bukidnon.

“Pagpalambo sa kahimtang sa katawhan ang kanunay gilantaw ni Governor Jose Ma. “Nonoy Joe” Zubiri”, ang gipaabot og tipik sa pamahayag ni Board Member Richard Dinlayan Macas, Provincial IPMR, diin maoy nag representar kang Governor Zubiri atol sa turnover ceremony.

Dugang kalipay sa mga benepisyaryo sa dihang ilang gidawat ang Certificate of Award nga pinirmahan ni Governor Zubiri og Mayor Inocando isip pamatuod sa pagpanag-iya na sa maong panimalay diin ang luna gidonar gikan sa lokal nga kagamhanan sa Cabanglasan isip counterpart sa lungsod.

Sa katapusan nanghinaut si Kapitan Reynard O. Encarguez sa tanang benepisyaryo nga magpuyo nga malinawon og malambuon sa bag-o nilang pinuy-anan.

###