Press Release No. 210

October 27, 2021

MAKUTI nga gihimay-himay sa mga miyembro sa Sangguniang Panlalawigan (SP) ang gi-presenta sa Provincial Budget Office nga Annual Budget sa Pangagamhanang Probinsyal sa Bukidnon alang sa tuig 2022, partikular sa pondo nga gitagana alang sa Peace and Order Program and Support Services, atol sa gipahigayon nga Budget Committee Hearing sa Committee on Appropriations nga gitimon sa committee chairman niini nga si Board Member Ranulfo E. Pepito, kagahapong adlawa-Oktobre 26, 2021.

Pinaagi sa imbitasyon ni Board Member Oliver Owen L. Garcia, kinsa mao ang chairman sa Peace and Order Committee, mitambong sa maong pagdungog si Provincial Budget Officer Fe Retuertas, uban nila Brigadier General Ferdinand T. Barandon, ang commander sa 403rd Infantry Brigade sa Philippine Army ug Police Colonel Jun Mark J. Lagare, provincial director sa Bukidnon Provincial Police Office (BukPPO) aron ma-diskusyonan ang budget allocation alang sa sektor sa kalinaw ug kalamboan. 

Nakalatid sa General Public Services ang 30-milyones ka pesos nga gigahin nga pondo alang sa Peace and Order Program and Support Services sa kasundaluhan ug kapulisan nga nag-operate sulod sa probinsya. Kini nga pondo instrumento sa paghatag katumanan sa gisugyot nga mga programa ug kalihukan, subay sa Peace and Order Public Safety Plan (POPS Plan).

Gipakisayud ni BGen. Barandon nga pinasikad sa POPS Plan, nakatutok ang programa ug kalihukan sa kasundaluhan sa pagsulbad sa problema sa insurhensya, panagbangi sa yuta, ug ang problema sa terorismo. Samtang prioridad usab sa kapulisan ang pagpalit ug mga kahimanan ug ekipo alang sa anti-criminality operations ingon man ang pagpa-ayo sa ilang mga opisina, sigun ni PCol. Lagare.

Mahinumduman nga dako ang pagpasalamat ni PNP Chief General Guillermo Eleazar  sa gihatag nga suporta sa Provincial Government of Bukidnon sa kapulisan sa lalawigan, nonot sa gihimo nga ceremonial turnover sa mga gamit ug mga salakyan, dungan sa Command Visit niini sa BukPPO, niadtong Oktobre 23, 2021.

###