Press Release No. 213

October 28, 2021

NAGPAGULA si Provincial Governor Jose Ma. R. Zubiri Jr. ug kamanduan agi ug suporta sa nagpadayon nga National Vaccination program sa gobyerno, pinaagi sa Department of Health (DOH), nga nagtinguha nga makab-ot ang herd immunity sa Bukidnon. Ang maong programa gisugdan niadtong bulan sa Marso ning kasamtangan tuig.

Pinaagi sa Memorandum No. 237 s. 2021 ni Governor Zubiri, pinetsahan Oktubre 19, 2021 gidasig niini ang mga medical frontliners nga mopaubos sa vaccination program aron nga maprotektahan ang ilang mga kaugalingon samtang gaatiman sa katawhan nga matakbuyan sa COVID-19.

Taliwala nga dili pinugsanay ang pagbakuna batok COVID-19, tumong sa maong kamanduan nga mapabiling luwas ang ilang trabahuan busa kung kinsa kadtong hospital employees (Frontliners) nga dili pa fully vaccinated, ipaubos sa Reverse Transcription-Polymerase Chain Reaction (RT-PCR) Test matag duha ka semana, gikan sa ilang kaugalingong gasto.

Basi sa data nga natigom gikan sa walo (8) ka mga Bukidnon Provincial Hospital (BPHs) nga naglakip sa Bukidnon Provincial Medical Center (BPMC), as of October 27, 2021 aduna na lamang 2.58% o 51 ka hospital employees ang dili pa fully vaccinated diin 31 dinhi ang naka-first dose na, sanglit ang uban adunay existing medical conditions ug ang uban nagpaabot sa ilang 2nd dose alang niadtong bag-o lang gi-hire isip additional personnel alang sa COVID-19 response sa probinsya.

As of October 25, 2021, ang Bukidnon aduna pa’y kinatibuk-ang 256,943 fully vaccinated o 24.04% herd immunity coverage gikan sa 1,068,778 nga target population.

###